Қазақстан көші-қон саясатын жаңартуға кірісті. Енді ел инвесторлар мен білікті мамандарды, таланттарды тартуға бағытталған жаңа модельге көшпек. Тиісті жарлыққа Қасым-Жомарт Тоқаев қол қойды, деп хабарлайды dalanews.kz.
Құжат аясында бұрынғы квоталық-рұқсат беру жүйесінен бас тартып, ынталандыруға негізделген тәсіл енгізіледі. Негізгі мақсат - Қазақстанды инвестиция мен адами капиталы шоғырланатын өңірлік хабқа айналдыру. Үкіметке барлық өзгерісті 2026 жылдың соңына дейін толық жүзеге асыру тапсырылған.
Визалық жүйе жаңарады
Реформа шеңберінде визалардың санаты қайта қаралып, жаңа форматтар енгізіледі. Атап айтқанда, инвесторлар мен директорлар кеңесінің мүшелеріне арналған бизнес-виза, ғалымдар, дәрігерлер, мәдениет қайраткерлері мен жетекші жоғары оқу орындарының түлектеріне арналған білікті маман визасы, сондай-ақ нақты инвестициялық жобаларға қатысатындар үшін уақытша жұмыс визасы қарастырылған. Реформаның өзегі — "Алтын виза". Бұл құжат инвесторлар мен сұранысқа ие мамандарға беріледі. Әсіресе IT саласының мамандары үшін оны рәсімдеу мерзімі шамамен бір айды құрауы мүмкін. Иелеріне мемлекеттік қызметтерге кеңейтілген қолжетімділік беріледі, бұл құқықтар іс жүзінде азаматтардың мүмкіндігіне жақындайды.
Салықтық жеңілдіктер қарастырылған
"Алтын виза" иелері мен олардың отбасы мүшелеріне бірқатар салықтық жеңілдіктер ұсынылады. Атап айтқанда, олар жеке табыс салығынан, мүлік және жер салығынан босатылады. Сонымен қатар мұндай резиденттер жалпыға бірдей декларация тапсыру міндетінен де босатылады. Бұған қоса, шетелдіктер үшін цифрлық жеке куәлікке балама болатын резиденттің цифрлық ID-і енгізіледі.
Цифрландыру мен e-Residency
Шетел азаматтарына арналған бірыңғай QazETA платформасы іске қосылады. Оның құрамындағы e-Residency модулі арқылы өтініштерді қашықтан, «бір терезе» қағидатымен тапсыруға болады. Сондай-ақ e-Residency Invest бағдарламасы енгізіліп, электронды резиденттерге Қазақстандағы және Астана халықаралық қаржы орталығы алаңындағы жобаларға инвестиция салуға мүмкіндік беріледі.
Ағылшын тіліндегі сервис пен жаңа хабтар
Астана мен Алматыда мемлекеттік және әлеуметтік қызметтерде ағылшын тіліндегі сервисті міндетті түрде енгізу жоспарланып отыр. Бұл медицина, білім беру, халыққа қызмет көрсету орталықтары, полиция және коммуналдық қызметтерге қатысты болады. Алматыда жасанды интеллект жобаларын дамытуға арналған Almaty AI Hub іске қосылады.
Қаржы орталығына өзгеріс
Астана халықаралық қаржы орталығында салық резиденттігін алу үшін қажетті ең төменгі болу мерзімі 90 күннен 30 күнге дейін қысқартылады. Бұл мобильді инвесторлар үшін елдің тартымдылығын арттыруға бағытталған. Ұлттық банк пен өзге де органдарға жаңа резиденттер үшін қолайлы қаржылық режим қалыптастыру тапсырылған.
Инвестиция өсімі байқалды
Айта кетейік, 2026 жылдың бірінші тоқсанында Қазақстанда негізгі капиталға салынған инвестициялар көлемі артқаны тіркелген. Жарлық қол қойылған күннен бастап күшіне енді.
