Qazaqstan joldarynda elektrsamokat, moped, velosiped jáne basqa da jeke mobildilik quraldaryn paidalanatyndar kóbeigen saiyn jol apatynyń da sany artyp bara jatyr, dep habarlaidy dalanews.kz.
Bas prokýratýra málimetinshe, jyl basynan beri moped júrgizýshileriniń kinásinen 390 jol apaty tirkelgen. Saldarynan 33 adam qaza taýyp, 461 adam jaraqat alǵan. Sondai-aq, velosipedshilerdiń kinásinen 169, shaǵyn elektr kólik quraldaryn paidalanýshylardyń kinásinen 97, elektrsamokat júrgizýshileriniń kinásinen 47 jol apaty bolǵan.
Osy apattardan kámeletke tolmaǵan 329 bala zardap shegip, 10-y kóz jumǵan.
Sonymen qatar, jeke mobildilik quraldaryn paidalanýshylardyń ózderi de joldaǵy kólikterden zardap shegip jatyr. Jyl basynan beri elektrsamokat júrgizýshilerin kólik qaǵyp ketken 145 jaǵdai, moped júrgizýshilerine qatysty 82 jáne shaǵyn elektr kólik quraldaryn paidalanýshylardy kólik qaǵyp ketken 52 jaǵdai tirkelgen.
Osynyń saldarynan tórt adam qaza taýyp, 300-ge jýyq adam túrli jaraqat alǵan.
Aita keteiik, búginnen bastap elektrsamokattyń trotýarlar, jaiaý júrginshiler joldarymen júrýine tyiym salynady.
