Almatyda jol ústindegi janjal kezinde taksi júrgizýshisine kúsh qoldanǵan er adam ustaldy. Oqiǵanyń videosy áleýmettik jelide taraǵannan keiin politsiia tekserý júrgizgen, dep habarlaidy dalanews.kz.
Kadrlardan eki júrgizýshiniń arasynda janjal týyndap, olardyń biriniń ekinshisine qol kótergenin kórýge bolady.
Jýrnalist Mihail Kozachkovtyń jazýynsha, janjal taksi júrgizýshisiniń jol bermeýinen bastalǵan. Buǵan ashýlanǵan ekinshi júrgizýshi ony qýyp jetip, máseleni kúsh qoldaný arqyly sheshpek bolǵan.
"Kúdikti - 59 jastaǵy Vadim Petenev", - dep jazdy ol.
Almaty qalalyq politsiia departamenti atalǵan derek boiynsha sotqa deiingi tergeý bastalǵanyn habarlady.
"Kúdikti anyqtalyp, ustaldy jáne ýaqytsha ustaý izoliatoryna qamaldy", – delingen politsiia habarlamasynda.
Kúdiktiniń áreketine qandai quqyqtyq baǵa beriletini jábirlenýshige jasalatyn sot-meditsinalyq saraptamanyń qorytyndysyna bailanysty bolady.
Qazir tergeý jalǵasyp jatyr. Istiń barysy Almaty qalalyq politsiia departamenti basshylyǵynyń baqylaýyna alynǵan.
Politsiia jol ústindegi kez kelgen daýdy zań aiasynda sheshý qajettigin eske salyp, ózge jol qozǵalysyna qatysýshylarǵa kúsh qoldanǵandar jaýapqa tartylatynyn eskertti.
