Ulttyq dombyra kúnine orai Jetisý oblysynda Muqan Tólebaev atyndaǵy orkestrdiń mýzykanttary tikelei efirde álemniń 10 eli men respýblikalarynan dombyrashylarymen birge Nurǵisa Tilendievtiń «Alqisa» kúiin bir mezette oryndady, dep habarlaidy dalanews.kz.
Merekelik shara Taldyqorǵan qalasynda ótti. Tikelei efir arqyly oǵan Qytai, AQSh, Túrkiia, Belgiia, Túrikmenstan, Qyrǵyzstan, Ózbekstan, Tájikstan, Bashqurtstan jáne Altai ólkesinen dombyrashylar qatysyp, osylaisha qazaqtyń kúi óneriniń sheberleri men janashyrlaryn bir arnaǵa toǵystyrdy.
Kórermenge erekshe áser qaldyrǵan teatrlandyrylǵan prolog barysynda aqsaqaldyń dombyrany aldymen jas býynǵa, keiin búldirshinge simvoldyq túrde tabystaýy urpaqtar sabaqtastyǵy men ulttyq muranyń máńgilik ómirsheńdigin kórkem beineledi. Jas ónerpaz oryndaǵan alǵashqy kúidi Muqan Tólebaev atyndaǵy halyq aspaptar orkestri jalǵastyryp, kontserttik baǵdarlamanyń shymyldyǵyn ashty.
Merekelik kontsert aiasynda halyq aspaptar orkestri, dástúrli án oryndaýshylary men tanymal kúishiler qazaq mýzyka óneriniń tańdaýly shyǵarmalaryn oryndady. Qurmanǵazynyń «Adai», «Mahambet» kúileri, halyq ánderi men termeler kórermenniń kóńilinen shyqty. Ulttyq bi ansamblderiniń jarqyn qoiylymdary merekeniń ulttyq naqyshyn aishyqtai tústi.
Sharanyń eń qyzyqty bólimderiniń biri kórermenderge arnalǵan interaktivti oiyndar boldy. Qatysýshylar dombyra tarihy men qazaqtyń kúi oryndaýshylyq ónerine qatysty suraqtarǵa jaýap berip, ózderiniń mol bilimi men mádeni muraǵa degen shynaiy qyzyǵýshylyǵyn kórsetti.
Merekeniń arnaiy qonaǵy Qazaqstannyń eńbek sińirgen qairatkeri Baqbergen Asqarbekov Ulttyq dombyra kúniniń mańyzdylyǵyna erekshe toqtaldy.
— Dombyra – halqymyzdyń tarihyn, dúnietanymyn jáne ómir saltyn saqtap kelgen qasietti mura. Osyndai merekeler arqyly jas urpaq ulttyq ónerdiń qadir-qasietin tereńirek túsinedi. Jetisýdyń shyǵarmashylyq dástúrin jalǵastyryp júrgen ónerpazdardyń, belgili kúishiler men jas oryndaýshylardyń sheberligi árbir tyńdarmannyń júreginen oryn tapty, – dedi ol.
Qala turǵyny Ainagúl Sársenbaiqyzy da óz áserimen bólisti.
— Bul kesh bizge tamasha mýzyka syilady. Dombyranyń qońyr úni Qaratal ózeniniń jaǵasynda erekshe ásermen qalyqtady. Osyndai mazmundy mádeni sharalar qoǵamnyń rýhani álemin baiytyp, ulttyq ónerimizdiń ómirsheńdigin taǵy bir márte dáleldeidi, – dedi ol.
