Qazaqstanda kólik quraldaryn synaqtan ótkizetin zerthanalardy baǵalaý kezinde foto jáne beinetirkeý tetigi engizildi, dep habarlaidy dalanews.kz.
Bul jumys KTRM Saýda jáne integratsiia ministrliginiń Ulttyq akkreditteý ortalyǵy tarapynan júrgizilip jatyr.
Jańa tásil zerthanalardyń kólik quraly konstrýktsiiasynyń qaýipsizdik sertifikatyn berý úshin qajetti synaqtardy is júzinde júrgizetinin tekserýge múmkindik beredi.
Akkreditteý jónindegi sarapshy aýditorlar zerthanadaǵy árbir synaq jabdyǵyn foto jáne videoǵa túsiredi. Onyń zaýyttyq nómiri, tehnikalyq jaǵdaiy, ólsheý diapazony jáne jumys protsesi tirkeledi. Bul jabdyqtyń naqty osy zerthanada ornalasqanyn jáne synaq kezinde paidalanylǵanyn rastaýǵa múmkindik beredi. Sonymen qatar baqylaý synaqtarynyń ózi de beinetaspaǵa jazylady. Osy arqyly zerthananyń jumysty óz kúshimen oryndaǵany, tiisti jabdyq pen bilikti mamandary bar ekeni tekseriledi.
Ulttyq akkreditteý ortalyǵynyń málimetinshe, foto jáne beinematerialdar keiin týyndaýy múmkin daýly jaǵdailardy da naqtylaýǵa múmkindik beredi. Túsirilim akkreditteý sýbektileriniń kelisimimen jáne jasalǵan sharttar aiasynda júrgiziledi.
Jańa tetik synaq zerthanalarymen ǵana shektelmeidi. Qazir foto jáne beinetirkeý tekserý jáne kalibrleý zerthanalaryn, ekologiialyq synaqtar men buzbai baqylaý júrgizetin zerthanalardy baǵalaý kezinde de qoldanylyp jatyr.
Búginge deiin jańa mehanizm arqyly 55 zerthana baǵalaýdan ótti. Sonymen qatar synaq zerthanalaryndaǵy jabdyqtardy sáikestendirý jobasy iske asyrylyp jatyr. Arnaiy tańbalaý arqyly mamandar baǵalaý kezinde jabdyq týraly aqparatty tsifrlyq formatta birden teksere alady.
2026 jylǵy 18 tamyzdaǵy jaǵdai boiynsha 40 akkreditteý sýbektisindegi jabdyq sáikestendirildi. Kólik salasynda jumys isteitin synaq zerthanalaryna qoiylatyn taǵy bir talap boiynsha qajetti jabdyqtyń keminde 95%-y zerthananyń menshiginde bolýy tiis.
Bul talap zerthanalardyń tek qujat júzinde akkredittelýine jol bermeýge jáne júrgiziletin synaqtardyń naqtylyǵyn arttyrýǵa baǵyttalǵan.
Aldaǵy kezeńde foto jáne beinetirkeýdi zańnamalyq turǵydan bekitý josparlanyp otyr. Tiisti ózgerister qabyldanǵan jaǵdaida bul tetik akkreditteý júiesiniń mindetti elementine ainalmaq.
