Oral turǵyny Telegram-nan jumys izdep júrip, internet-alaiaqtardyń qylmystyq shemasyna aralasyp ketken. Ol aqsha úshin basqa adamdarǵa bank shotyn ashqyzyp, olardyń derekterin úshinshi tulǵalarǵa berip otyrǵan. Bul týraly Batys Qazaqstan oblysy boiynsha Ekonomikalyq tergep-tekserý departamenti málimdedi, dep habarlaidy dalanews.kz.
Tergeý dereginshe, oqiǵa 2025 jyldyń kúzinde bolǵan. Jumyssyz júrgen er adam Telegram-arnalardyń birinen ońai aqsha tabýǵa bolatyn "jumys" týraly habarlandyrýdy kóredi. Onymen bailanysqan belgisiz adam bank shotyn ashyp, oǵan qoljetimdilikti berýge kelisetin adamdardy taýyp berýdi usynǵan.
Ol ár shotqa túsken aqshanyń 7 paiyzyn syiaqy retinde alýǵa tiis bolǵan.
"Alynǵan nusqaýlarǵa sáikes, er adam aqsha úshin bank shottaryn ashýǵa kelisetin azamattardy izdei bastaǵan. Solardyń biri Oral qalasynyń turǵyny boldy. Oǵan ekinshi deńgeili bankterdiń birinen shot ashqany úshin 30 myń teńge usynylǵan", – dep habarlady Ekonomikalyq tergep-tekserý departamenti.
Er adam áielge bank shotyn ashýǵa jáne beineverifikatsiiadan ótýge kómektesken. Osydan keiin onyń mobildi bankingi men shot derekterine qol jetkizip, málimetterdi shemany uiymdastyrýshyǵa jibergen.
Kóp uzamai jańadan ashylǵan shotqa 500 myń teńge túsken. Keiin bul aqshany internet-alaiaqtardyń qurbany bolǵan basqa adamnyń aýdarǵany anyqtaldy.
Oral turǵyny 500 myń teńgeniń 35 myń teńgesin ózine alyp, qalǵan 465 myń teńgeni shemany uiymdastyrýshyǵa bergen.
Is sotqa jetip, er adam kináli dep tanyldy. Oǵan 3 jyl 6 aiǵa bas bostandyǵyn shekteý jazasy taǵaiyndalyp, osy merzimge probatsiialyq baqylaý belgilendi.
