Qazaqstandyq belgili fototilshi Iýrii Bekker 68 jasynda ómirden ótti, dep habarlaidy dalanews.kz.
Qazaqstan Respýblikasy Mádeniet jáne aqparat ministrliginiń málimetinshe, Iýrii Zelmanuly Bekker jýrnalistika salasynda uzaq jyl eńbek etip, Qazaqstannyń fotoshejiresin qalyptastyrýǵa eleýli úles qosqan.
«Iýrii Bekkerdiń obektivi eldiń qoǵamdyq, saiasi jáne mádeni ómirindegi mańyzdy oqiǵalardy, belgili memleket qairatkerlerin, eńbek adamdaryn jáne qarapaiym azamattardy taspaǵa túsirdi. Onyń fotosýretteri Qazaqstannyń qazirgi tarihynyń bir bóligine ainalyp, óz dáýiriniń adamdary men oqiǵalaryn keiingi urpaqqa jetkizdi», - dep habarlady ministrlik.
Iýrii Bekkerdiń kásibi jolynyń edáýir bóligi «Kazahstanskaia pravda» gazetinde ótti. Ol ómiriniń sońǵy kúnderine deiin redaktsiiada jumysyn jalǵastyrǵan. Alaida fototilshiniń shyǵarmashylyq murasyndaǵy eń mańyzdy betterdiń biri 1986 jylǵy Jeltoqsan oqiǵasyna bailanysty.
QazTAG málimetinshe, Iýrii Bekker 1986 jylǵy 16 jeltoqsandaǵy qaiǵyly oqiǵalarǵa qatysqan jeltoqsanshylardyń sot protsesine qatysýǵa ruqsat alǵan jalǵyz fotograf bolǵan. Sol kezde ol QazTAG aqparat agenttiginiń atynan jumys istegen.
Osylaisha, Bekker Jeltoqsan oqiǵasyna qatysýshylarǵa qatysty sot protsesin fotoǵa túsirgen jalǵyz fototilshi retinde tarihta qaldy.
Keiin onyń kásibi joly «Kazahstanskaia pravda» gazetinde jalǵasty. Áriptesteri Iýrii Bekkerdi talantty fotojýrnalist, jaýapkershiligi joǵary, printsipshil ári kásibine adal maman retinde eske alady.
Qazaqstan Respýblikasynyń Mádeniet jáne aqparat ministrligi Iýrii Bekkerdiń týǵan-týystary men jaqyndaryna, áriptesteri men dostaryna kóńil aitty. Fototilshiniń jarqyn beinesi men Qazaqstan tarihynyń mańyzdy sátterin saqtap qalǵan fotosýretteri onyń kásibi murasy bolyp qala beredi.
