Tarazdaǵy Shóldala shaǵynaýdanynda memleket qarjysyna otyrǵyzylǵan 1 500 túp tal kútimsiz qalyp, qýrap ketken. Qala ákimdigi buǵan aýmaqta sýarý júiesiniń bolmaýy sebep bolǵanyn málimdedi, dep habarlaidy dalanews.kz.
Qara taldyń shybyqtary 2020 jyly Shóldala shaǵynaýdanynyń Iýbileinyi alqabyna jaqyn aýmaqta otyrǵyzylǵan. "Taraz orman" mekemesi shamamen 3,5 gektar jerge 1 500 túp kóshet ekken. Alaida olardy turaqty sýaratyn júie qarastyrylmaǵandyqtan, taldardyń kóbi alǵashqy kezeńnen-aq jersinbei qalǵan.
Qala ákimdigi kóshetterdiń qýraýyna qatysty júrgizilgen zerdeleý barysynda aýmaqtyń astymen joǵary qysymdy gaz qubyry ótetini anyqtalǵanyn málimdedi.
"Osyǵan bailanysty “QazTransGaz” AQ tarapynan bul aýmaqta abattandyrý jumystaryn júrgizýge, jasyl aimaq qurýǵa jáne tal egýge ruqsat berilmegen", - dep habarlady ákimdik.
Osylaisha, kóshet otyrǵyzylǵanǵa deiin jerdiń injenerlik jaǵdaiy tolyq zerttelmegen. Sýarý múmkindigi men qaýipsizdik talaptary aldyn ala eskerilmei, 1 500 túp taldyń taǵdyry keiinge qalǵan.
Ákimdik endi bul aýmaqqa sýarý júiesin tartý nemese qaitadan kóshet otyrǵyzý jospary joq ekenin jetkizdi.
"Atalǵan aýmaqqa bolashaqta sýarý júiesin tartý jáne tal egý jumystaryn júrgizý josparda qarastyrylmaǵan", - delingen resmi jaýapta.
Nátijesinde birneshe gektar jerge egilgen taldar qýrap, jasyl aimaq qurýǵa baǵyttalǵan bastama naqty jospardyń joqtyǵynan sátsiz aiaqtaldy. Al kóshetterdi sýarý múmkindigi bolmaǵan jáne aǵash egýge ruqsat berilmeitin aýmaqtyń nelikten tańdalǵany ázirge belgisiz.
