2 qyrkúiekke qaraǵan túni túriktiń birqatar áýe kompaniialary Máskeýge jáne keri baǵyttaǵy kem degende birneshe reisti toqtatty. Bul týraly reseilik salalyq pablikter habarlady, dep habarlaidy dalanews.kz.
Máskeýdegi «Vnýkovo» áýejaiynda túnde «Kover» dep atalatyn arnaiy rejim (áýe keńistigin shuǵyl jabý tártibi) engizilgen. Alaida shekteýler kúshine enbei turyp-aq túriktiń Pegasus Airlines áýe kompaniiasy Antaliia men Izmirden Máskeýge baǵyt alǵan PC-1576 jáne PC-1521 reisterin keri burǵan.
Sol sátte birinshi ushaq Litva aýmaǵynyń ústinde, al ekinshisi Vengriia aýmaǵynda bolǵan. Habarlanǵandai, eki áýe kemesi de ushyp shyqqan áýejailaryna qaita oralǵan. Litva áýe keńistigindegi ushaq Kaýnas qalasy mańynda baǵytyn kúrt ózgertken. Máskeý ýaqyty boiynsha saǵat 01:35-te ol Antaliia halyqaralyq áýejaiyna qonǵan.
Máskeý ýaqytymen 22:45-te Ystanbuldan ushýy tiis bolǵan PC-386 reisi de, Flightradar24 servisiniń málimetinshe, ushýǵa daiyndalǵanymen, áýejaidan kóterilmegen. Sondai-aq Bodrýmnan PC-1456, Ystanbuldan PC-390 jáne Dalamannan PC-1458 reisteri oryndalmaǵan. Túrkiiadan ushaqtar Máskeýge jetpegendikten, Pegasus Airlines keri baǵyttaǵy reisterin de júzege asyra almaǵan.
Osylaisha Antaliia, Ystanbul, Izmir, Bodrým jáne Dalaman baǵyttaryna bilet satyp alǵan jolaýshylar Máskeýden Túrkiia qalalaryna usha almady. Týristerge reisterdiń basqa kúnderge aýystyrylǵany habarlanǵanymen, naqty qai kúnder ekeni ázirge belgisiz.
«Balamaly reister týraly aqparat qosymsha habarlama arqyly jiberiledi. Qazirgi ýaqytta basqa reisterge qaita brondaý josparlanbaǵan. Federaldyq aviatsiia qaǵidalary aiasynda qyzmet kórsetý qarastyrylmaǵan», – delingen habarlamada.
Sonymen qatar Turkish Airlines áýe kompaniiasy da Ystanbuldan Máskeýge baǵyttalǵan TK-419 jáne TK-407 reisterin toqtatty. Soǵan sáikes keri baǵyttaǵy TK-420 jáne TK-408 reisteri de oryndalmaǵan.
