Bishkektiń Pervomai aýdandyq soty jappai tártipsizdik uiymdastyrýǵa daiyndyq jasady degen is boiynsha úkim shyǵardy. Is boiynsha aiyptalýshylar qatarynda Qyrǵyzstannyń burynǵy prezidentiniń uly men «Sotsial-demokrattar» partiiasynyń ókilderi bar, dep habarlaidy dalanews.kz.
Sýdia shyǵarǵan úkimge sáikes:
Temirlan Sultanbekov kináli dep tanylyp, múlki tárkilene otyryp 4 jylǵa bas bostandyǵynan aiyryldy. Sonymen qatar sailaýshylardyń daýysyn satyp alý týraly 2025 jylǵy úkim boiynsha ótelmegen jazasy eskerilip, jalpy 7 jylǵa sottaldy;
Qadyrbek Atambaev kináli dep tanylyp, múlki tárkilene otyryp 4 jylǵa bas bostandyǵynan aiyryldy;
Ermek Ermatov kináli dep tanylyp, 2 jylǵa sottaldy. Alaida probatsiialyq baqylaý qoldanylyp, jazasyn túzeý mekemesinde óteýden bosatyldy;
Qýbanychbek Qadyrov aqtaldy;
Jeńish Abdrahmanov múlki tárkilene otyryp 8 jylǵa sottaldy;
Serikbai Qubalanbek ýýlý jazadan bosatylyp, Qazaqstanǵa deportatsiialandy.
Eske salsaq, 2025 jyldyń qarasha aiynyń sońynda jappai tártipsizdik uiymdastyrýǵa daiyndyq jasady degen kúdikpen Qadyrbek Atambaev, Temirlan Sultanbekov, Ermek Ermatov, Jogorký Keńestiń burynǵy depýtattary Qýbanychbek Qadyrov pen Shailoobek Atazov, kásipker Ýrmat Baryqtabasov, Almazbek Atambaevtyń burynǵy kúzetshisi Damir Musaqeev jáne taǵy basqa azamattar ustalǵan bolatyn. Qyrǵyzstan IIM sol kezde 10 adamnyń ustalǵanyn habarlaǵan.
Tergeý nusqasyna sáikes, olar parlament depýtattarynyń merziminen buryn ótetin sailaýynan keiin jappai narazylyq aktsiialaryn uiymdastyrýdy josparlaǵan.
Biyl 14 shildede Pervomai aýdandyq sotynda isti máni boiynsha qaraý bastaldy. Sot protsesi jabyq rejimde ótti. Shilde aiynda Shailoobek Atazovqa, Ýrmat Baryqtabasovqa jáne Damir Musaqeevke qatysty materialdar bólek óndiriske shyǵarylǵan edi.
