Birneshe ai buryn zańsyz kásipkerlik pen qylmystyq jolmen alynǵan qarajatty zańdastyrý isi boiynsha sottalǵan blogerler Erbolat Janábilov pen Elmira Tólegenovanyń otbasynda janjal shyqty. Tólegenova kúieýiniń telefondary men áleýmettik jelidegi paraqshalaryn baqylaýǵa alýǵa áreket jasaǵanyn aitty, dep habarlaidy dalanews.kz.
Onyń sózinshe, janjal kezinde ol kiim bólmesine qamalyp, ekinshi telefony arqyly video túsirgen.
"Kúieýim Erbolat Janábilov jeke zattarymdy, telefondarymdy jáne áleýmettik jelidegi paraqshalarymdy tartyp alyp jatyr. Qazir kiim bólmesine qamalyp otyrmyn. Qolymdaǵy ekinshi telefonnyń qýaty bes paiyz ǵana qaldy", – dedi ol.
Elmira Tólegenova kúieýiniń týystarymen birge bólmege kirýge áreket jasaǵanyn da málimdedi. Onyń aitýynsha, olar otbasy týraly keibir aqparattyń áleýmettik jelige jariialanyp, qoǵamǵa tarap ketýinen qaýiptengen.
"Olar meniń áleýmettik jelide osy otbasyǵa qatysty áldeneni jariialaýymnan qorqady. Erbolat storisterdiń bárin óshirip jatyr. Qoldarym qyzaryp ketti", - dedi Tólegenova.
Buǵan qosa, áieliniń paraqshasynda Erbolat Janábilovke baǵyttalǵan birneshe jazba paida boldy.
"Sen jáne seniń otbasyń týraly bar shyndyqty aitamyn. Meniń akkaýnttarym men jazbalarymdy óshirýdi toqtat. Shydaýdan sharshadym", – delingen sonyń birinde.
Sondai-aq paraqshada esirtkige qatysty aiyptaý sipatyndaǵy jazbalar jariialanǵan. Alaida onyń mazmunyn rastaityn naqty dálel ázirge usynylǵan joq. Áleýmettik jeli qoldanýshylarynyń keibiri jazbalardyń shynaiylyǵyna kúmán keltirip, akkaýntqa bógde adamdar kirýi múmkin ekenin de jazyp jatyr.
Ázirge Erbolat Janábilov atalǵan málimdemelerge qatysty kópshilik aldynda túsinikteme bergen joq.
Keiin Elmira Tólegenova ózine eshkim qol kótermegenin málimdep, áleýmettik jelide jalǵan aqparat pen feik paraqshalar tarap jatqanyn aitty. Onyń túsindirýinshe, Erbolat ekinshi telefonyn alyp qoimaq bolǵan kezde ol garderob bólmesine kirip, esikti ishinen japqan.
"Aramyzda tóbeles nemese basqa da kúsh qoldaný bolǵan joq. Bul jaǵdaidy óz betterińizshe joramaldaýdyń qajeti joq. Keiin bárin túsindiremin. Qazir úidemin, balalarym qasymda, jaqyndarym janymda", – dedi bloger.
Sonymen qatar Tólegenova Erbolat Janábilovpen ajyrasyp jatqanyn málimdedi.
Aita keteiik, biyl sáýirde Astana soty erli-zaiyptyny zańsyz kásipkerlikpen ainalysý jáne qylmystyq jolmen alynǵan aqshany zańdastyrý baptary boiynsha kináli dep tanyǵan. Is materialdarynda blogerlerdiń litsenziiasyz utys oiyndaryn ótkizip, asa iri kólemde tabys tapqany kórsetilgen.
Sot Erbolat Janábilovke eki jyl bas bostandyǵyn shekteý jazasyn taǵaiyndady. Elmira Tólegenova eki jylǵa bas bostandyǵynan aiyrylǵanymen, kámeletke tolmaǵan balalarynyń bolýyna bailanysty jazany óteý merzimi 2028 jylǵy 27 sáýirge deiin keiinge qaldyryldy. Memleket paidasyna segiz avtokólik pen 17 iPhone tárkilendi. Al is boiynsha keltirilgen 247,6 million teńge zalal tolyq ótelgen.
