Iran men AQSh-qa áskeri qaqtyǵysty toqtatýǵa arnalǵan jospar usynyldy. Eger kelisim júzege assa, ol 6 sáýirde kúshine enip, Ormuz buǵazy arqyly keme qatynasyn qaita jandandyrýy múmkin. Bul týraly Reuters agenttigi málimdedi, dep habarlaidy Dalanews.kz.
Kelisimniń mazmuny qandai?
Atysty toqtatýǵa arnalǵan negizdik qujatty Pákistan ázirlep, ony 5 sáýirden 6 sáýirge qaraǵan túni Iran men AQSh-qa joldaǵan. Derekkózdiń aitýynsha, usynys eki kezeńnen turady: aldymen – dereý atysty toqtatý, keiin – tolyqqandy kelisimge qol qoiý.
"Barlyq tetik búgin kelisilip bitýi tiis", – dedi derekkóz.
Onyń aitýynsha, alǵashqy ýaǵdalastyqtar ózara túsinistik týraly memorandým túrinde rásimdelmek. Qujatty taraptar Pákistan arqyly elektrondy formatta bekitýdi josparlap otyr. Qazirgi kelissózderde Pákistan negizgi bailanys arnasy retinde qarastyrylyp otyr.
Usynystyń negizgi sharttary
Josparǵa sáikes, atysty toqtatý rejimi birden kúshine enip, Ormýz buǵazy ashylady. Budan keiin 15–20 kún ishinde keń aýqymdy kelisimniń tolyq nusqasy pysyqtalady. Aldyn ala "Islamabad kelisimi" dep atalǵan qujat buǵazǵa qatysty óńirlik qaýipsizdik tetikterin qamtidy. Sońǵy kelissózder Islamabadta ótýi múmkin.
Sonymen qatar túpkilikti kelisim aiasynda Iran iadrolyq qarý jasaýǵa umtylmaý jóninde mindetteme alady. Onyń ornyna sanktsiialardy jeńildetý jáne buǵattalǵan aktivterdi bosatý máselesi qarastyrylmaq.
Ázirge AQSh pen Irannyń resmi ókilderi bul máselege qatysty jedel pikir bildirgen joq. Pákistan Syrtqy ister ministrliginiń ókili Tahir Andrabi de túsinikteme berýden bas tartty.
Aita keteiik, buǵan deiin Axios basylymy 5 sáýir kúni derekkózderge silteme jasap, AQSh, Iran jáne óńirlik deldaldar 45 kúndik ýaqytsha bitim múmkindigin talqylap jatqanyn habarlaǵan edi.
