Kezinde ǵoi halyq «Habardy» kóretin. Keshki jańalyqtaryn aitamyz. Senetin. Al qazir kim kóredi?
Aitalyq, «Habar» kórsetetin jańalyq nemese taratatyn aqparat sizge qanshalyqty qyzyqty? Odan buryn «Habar» taratqan habarǵa senesiz be?
Qoiyńyz, «senemin» degenge senbeimiz. Qazirgi turmysymyzǵa qarasaq, «Habar» búginginiń emes, bolashaqtyń dúniesin aityp jatqandai kórinedi. Bolashaqta bolýy múmkin, oryndalyp qalýy kədik armandar...
Endi she, memleketimizdiń ózi bizdi soǵan sendirip, kerek deseńiz tərbielep otyr ǵoi. Baqytty bolashaq nemese "2030" nemese "2050" nemese...
Qaryshtaǵan Qazaqstan. Qarqyndy damý ústindegi Qazaqstan. Taǵy qandai teńeý bar edi?
Anyǵynda, «Habar» kórsetetin Qazaqstan shyn ómirde joq. «Habar» kórsetetin Qazaqstanda ómir súrgim keledi» degen sarkazm (aitpaqshy, sarkazm əzil emes) sodan qalǵan.
Biyl «Habardyń» qurylǵanyna jiyrma jyl toldy. Anyǵy, «Habar» qurylǵaly beri jiyrma jyl ótken.
Kóp dúnie ózgerdi. Oi, orta, kózqaras...
Biraq ómir ózgergenmen, «Habar» ózgergen joq.
«Habardyń» keshki jańalyqtaryndaǵy Qazaqstan shynymen de jumaq meken. Qoi ústine boztorǵai jumyrtqalaǵan Asanqaiǵynyń armany.
Iə, qalanyń halqynda tańdaý bar. Al aýyldaǵy jurt bertinge deiin aldanyp keldi, bir qyzyǵy. Ainaldyrǵan tórt telearna... «OtaýTV» qosylǵaly kózi ashyldy. Qazaqstandy basqa qyrynan tanydy jəne basqa qyrynan kórdi. Əli de ilgeride aitqan tórt telearnany toqsan ainaldyryp otyrǵan aǵaiyn bar. Olardy ańqaýlyǵy úshin sóge almaisyń, ərine.
Məsele munda emes delik.
«Habardyń» jańalyqtaryn eki jikke bólýge bolady, bizdińshe.
Əlem-aqparat nemese shetel jańalyqtary shylǵai negativten turady. Mysaly:
«Grekiianyń hali nashar», «Qara qurlyqtyń bəlenbai elinde jarylys boldy» bolmasa «Kolýmbiianyń halqy narazylyqqa shyqty», – deidi "Habar".
Jaraidy, búlik bolmai-aq qoisyn. Biraq qazirgi Qazaqstandaǵy jaǵdaidy boiamasyz kórsetýge «Habardyń» júregi daýalamaidy.
Daǵdarys tereńdedi. Teńge qunsyzdandy. Biýdjet ortaidy... Ailyq pa? Ailyq ornynda qaldy. Kóbeigeni 100 paiyz qunsyzdanǵan teńgeniń jyrtyǵyn jamaýǵa jetpeidi. Esesine, jer-jerde qysqartý kóbeidi. Únemdeý bastaldy. 25 jyl boiy ertegige sengen el haosqa tústi.
Iə, túsinikti. Júregi nege daýalamaitynyn bilemiz ǵoi. Basshylyq bar, baqylaý bar, taǵy basqa úlken-kishi sebepter tolyp jatyr. Biraq asyra maqtaý men artyq pafostan halyqtan buryn, telearnanyń ózi ziian shegip jatqanyn əlgi «Habardyń» basshylyǵy bilmeýi múmkin emes.
«Habar» kórermeninen baiaǵyda aiyrylǵan. Kóziqaraqty kórermenniń «Habardan» əldeqashan kóńili qalǵan.
Kóńili qalǵan kórermen qazirgi Qazaqstannyń ahýalyn jaqsy biledi. Olar «Habardyń» keshki jańalyqtaryn kórse, kóterilip ketedi. «Habar» munysy qalai?», – deidi olar.
Iə, ómir ózgergenmen, «Habar» ózgergen joq. Aitpaqshy, «Habardy» kórmegeli kóp boldy...
Al FREDO
