Prezident Qasym-Jomart Toqaev búgin Qaraǵandy oblysynyń ákimi Ermaǵanbet Bólekbaevqa sógis berdi. Oblys ákimi jylytý maýsymyna daiyndyqty tiisti deńgeide qadaǵalamaǵany úshin sógis aldy. Osy tusta Dalanews.kz belgili saiasatker Ámirjan Qosannyń pikirin bildi.
Memlekettik qyzmetkerlerge qoldanylatyn jazanyń birneshe túri bar. Máselen, sógis, qatań sógis, qyzmetin tolyq atqarmaǵany úshin eskertý, laýazymyn tómendetý jáne jumystan bosatý.
Bólekbaevqa berilgen sógis basqa sheneýnikterge de eskertý bolǵany túsinikti. Óitkeni buǵan deiin de Qazaqstanda jylytý maýsymyna daiyndyq máselesi ýshyǵyp turǵan edi. Ridder, Ekibastuz turǵyndary kún sýytqanda jylýsyz qalǵany kóptiń esinde. Sarapshylar Sarandaǵy jaǵdaidy bilik endi ákimderge tikelei eskertý jasaýǵa kóshti dep te túsindiredi.
Al saiasatker Ámirjan Qosannyń pikirinshe, úiler sógispen jylyp ketpeidi.
"Másele bir qalada jylý bolmai qalýynda emes. Másele eldi basqarý júiesiniń múldem aqsap jatqanynda jáne eski Qazaqstan tusynda infraqurylym qaraýsyz qalýynda dep sanaimyn. Másele Sovet dáýirinde ústemdik etken ákimshilik-ámirshilik, iaǵni joǵarydan kelgen pármenmen qyzmet jasaýǵa daǵdylanǵan júieniń áli de saqtalýynda. Bizde ózin-ózi basqarý júiesi tolyq qalyptaspaǵan, tiisti Zań áli de tolyq pysyqtalmaǵan.
Damyǵan eldiń bir qalasynda osyndai oqys jaǵdai bolsa, el prezidenti sógis bermeidi emes pe? Úilerdi sógispen jylyta almaisyń! Ol úshin energiia men qatar tolyqqandy demokratiia, ózin-ózi basqarý júiesiniń ornyǵýy kerek!" - deidi sarapshy bul jaǵdai týraly.
Bul másele biraz ýaqyt buryn bastaldy. Saran halqy jylý joǵyn aityp shaǵymdanǵannan keiin sol kezdegi qala ákimi Erkin Baýlyqov el aldyna shyǵyp, keshirim de surady. Alaida Baýlyqovtyń keshirimi Bektenovti "jibite almady".
Úkimet otyrysynda Sarandaǵy jaǵdai kúr tártibinen tys, shuǵyl qaralyp, premer-ministr óńirdegi sheneýnikterdiń jumysyn ashyq synap, "Bul - Saran qalasy ákiminiń jeke jaýapkershiligi jáne oblys ákimdigi tarapynan tiisti baqylaýdyń joqtyǵy", - dedi.
Keiin qalaǵa energetika ministri Almasadam Sátqaliev jiberilip, qatań tekseris júrgizildi.
Artynsha oblys ákimi Ermaǵanbet Bólekbaev Saran qalasynyń ákimi Erkin Baýlyqov pen Qaraǵandy oblysynyń energetika jáne TKSh basqarmasynyń basshysy Tilektes Dosaevqa qatań sógis jariialady. Oblys ákiminiń birinshi orynbasary Azamat Taijanovqa eskertý túrinde tártiptik jaza berildi.
Degenmen keiin Saran ákimi Erkin Baýlyqov jumystan shyǵaryldy. Al búgin Bólekbaevtyń ózi de sógis alǵandar tizimine endi.
Aita keteiik, buǵan deiin Prezident Qasym-Jomart Toqaev mundai sógisti sý tasqyny kezinde mindetterin jóndi atqarmaǵan sheneýnikterge berdi. Olardyń qatarynda premer-ministrdiń birinshi orynbasary Roman Skliarǵa, sý resýrstary jáne irrigatsiia ministri Nurjan Nurjigitovke qatań sógis, Aqtóbe, Qostanai, Batys Qazaqstan oblystarynyń ákimderine qyzmettik mindetterine tolyq sai kelmeýine bailanysty eskertý, Atyraý, Aqmola, Almaty, Pavlodar jáne Abai oblystarynyń ákimderine qatań sógis berildi.
