Omandyq ekinshi ushqysh Hamam ál-Hammamige Tel-Avivke baǵyt alǵan Flydubai ushaǵyn basyp almaq bolǵany úshin Birikken Arab Ámirlikterinde ólim jazasy taǵaiyndalýy múmkin, dep habarlaidy dalanews.kz.
Bul týraly izraildik Ynet basylymy BAÁ-degi joǵary laýazymdy derekkózge silteme jasap jazdy. Derekkózdiń aitýynsha, Abý-Dabi ál-Hammamige qatysty eń qatań jaza qoldanýdy kózdep otyr.
29 jastaǵy Oman azamaty Hamam ál-Hammami Flydubai kompaniiasynyń 30 qyrkúiekte Dýbaidan Tel-Avivke ushqan FZ1073 reisiniń ekinshi ushqyshy bolǵan.
Ushý kezinde ol kabinadaǵy komandirge shabýyl jasap, apattyq baltany paidalanyp, ushaqty basqarýdy qolǵa alýǵa áreket jasaǵan. BAÁ Bas prokýratýrasy oqiǵany terrorlyq shabýyl jasaý áreketi retinde sipattady.
Shabýyldan keiin ushaq kúrt tómendei bastaǵan. Kapitan kabina esigin ashyp, jolaýshylar men ekipaj músheleri ál-Hammamidi zalalsyzdandyrǵan. Bortta bolǵan qosalqy ushqyshtardyń biri basqarýdy qolǵa alyp, ushaq Saýd Arabiiasynyń Tabýk qalasyna shuǵyl qonǵan. Borttaǵy 170-ten astam adamnyń barlyǵy aman qalǵan.
Tergeý barysynda ál-Hammamidiń shabýyldy aldyn ala josparlaǵan bolýy múmkin ekeni anyqtalyp jatyr. The Guardian málimetinshe, tergeýshiler onyń bastapqyda shabýyldy shilde aiynda jasaýdy josparlaǵanyn, keiin ony keiinge qaldyrǵanyn qarastyryp jatyr. Sondai-aq ol ushaqty Ben-Gýrion áýejaiyna nemese Tel-Aviv mańyndaǵy basqa nysanǵa qulatýdy kózdegen bolýy múmkin degen nusqa bar.
Ál-Hammami buǵan deiin Omannyń ulttyq áýe kompaniiasy Oman Air-de jumys istegen. BAQ-ta Oman biligi onyń radikaldy kózqarastaryna bailanysty ushý qyzmetinen shettetilgeni týraly málimetter jariialandy. Keiin ol Flydubai kompaniiasyna jumysqa ornalasqan.
Qazir isti Birikken Arab Ámirlikteri tergep jatyr. Tergeýge Izrail jáne basqa elderdiń tiisti qyzmetteri de qatysyp otyr. Negizgi máselelerdiń biri – ál-Hammamidiń jalǵyz áreket etkeni nemese basqa adamdarmen bailanysy bolǵan-bolmaǵanyn anyqtaý.
