Ulytaý oblysynda «Qazaqmys» kásiporyndarynan jalpy quny 20 mln teńgeden asatyn 10 tonnadan astam dizel otyny tárkilendi, dep habarlaidy dalanews.kz.
«Qazaqmys» qaýipsizdik departamenti men Ulytaý oblysy boiynsha Ekonomikalyq tergeý departamentiniń birlesken jumysy barysynda kompaniiaǵa tiesili janarmaidyń zańsyz alynýy, saqtalýy jáne satylýy anyqtalǵan.
Kompaniia málimetinshe, shemaǵa birqatar adamdar, onyń ishinde «Qazaqmystyń» enshiles kompaniiasy Tranco Express qyzmetkerleri de qatysqan. Tergeý deregine sáikes, urlanǵan dizel otyny jalǵan taýar-kólik qujattaryn paidalaný arqyly úshinshi tulǵalarǵa satylǵan.
Dizel otynynyń jalpy kólemi 10 tonnadan asyp, quny 20 mln teńgeden joǵary bolǵan.
Sotqa deiingi tergeý barysynda kúdiktilerdiń áreketi tabys tabý maqsatynda zańdy shyǵý tegin rastaityn qujattary joq munai ónimderin zańsyz satyp alý, saqtaý jáne satýǵa qatysty Qylmystyq kodekstiń 233-1-baby boiynsha saralanǵan.
Is sotqa joldanyp, Jezqazǵan qalalyq soty qatysy bar tulǵalarǵa ártúrli merzimge bas bostandyǵyn shekteý jazasyn taǵaiyndady. Sondai-aq munai ónimderin saqtaý jáne tasymaldaý úshin paidalanylǵan kólikter men ydystar tárkilendi.
«Qazaqmys» materialdyq resýrstardyń urlanýyna jáne basqa da zańbuzýshylyqtarǵa jol bermeý úshin ishki baqylaý tetikterin jetildirýdi jalǵastyratynyn málimdedi.
