Otandyq teleradio salasynyń ardageri, belgili telejýrnalist ári ustaz Marat Imanǵaliuly Sandyqbaev 70 jasqa qaraǵan shaǵynda ómirden ozdy, dep habarlaidy dalanews.kz.
Qaraly habardy jýrnalist Bazargúl Úmbetova áleýmettik jelidegi paraqshasynda jariialap, marqumnyń qazaq televiziiasynyń damýyna qosqan úlesin atap ótti.
Marat Sandyqbaev eńbek jolyn 1974-1975 jyldary Jezqazǵan oblystyq televiziiasynda kinooperator bolyp bastap, keiin televiziia jáne radio diktory qyzmetin atqarǵan.
Ol uzaq jyldar boiy teleradio salasynda eńbek etip, "Qazaqstan» RTRK" AQ Almaty filialynyń direktory jáne "Qazaqstan UTA" baǵdarlamasynyń direktory qyzmetterinde bolǵan.
Telejýrnalist shyǵarmashylyq jolynda da birqatar jetistikke jetti. Onyń "Kimsiń sen, Tolqynbek?" atty avtorlyq týyndysy odaqtyq baiqaýda úzdik dep tanylyp, júldeli oryn ielengen.
Marat Sandyqbaevtyń qaitys bolýyna bailanysty "Qazaqstan" RTRK» AQ Basqarma tóraǵasy Ernur Býrahan marqumnyń otbasyna kóńil aitty.
"Marat Imanǵaliuly – eldik iske adaldyǵymen, baiypty bolmysymen ainalasyna syily tulǵa, arda azamat edi. Ómir jolynda abyroily eńbek etip, ulttyq televiziia salasynyń damýyna zor úles qosty. Adamgershiligi men parasaty, ustazdyǵy, sabyrly minezi men izgi qasietteri jadymyzda máńgi saqtalady", – dedi ol.
Áriptesteri men shákirtteri de Marat Sandyqbaevty qarapaiym ári qamqor basshy, keiingi býynǵa baǵyt-baǵdar bergen ustaz retinde eske aldy.
Bazargúl Úmbetovanyń aitýynsha, ol basshylyq qyzmette júrse de qarapaiymdylyǵynan ainymai, jas jýrnalisterge únemi qoldaý kórsetken.
"Basshymyn dep daýys kótergenin múlde estimeppin. Qarapaiym qalpynda jańa kelgen jas jýrnalisterge jón siltep, qamqor bolyp júretin", – dep eske aldy jýrnalist.
Marat Sandyqbaev qurmetti demalysqa shyqqanǵa deiin ulttyq televiziia salasynda eńbek etip, keiingi býynǵa mol tájiribesin úiretti.
