Memleket basshysy buqaralyq aqparat quraldary ókilderine brifing ótkizip, mańyzdy saýaldarǵa jaýap berdi, dep habarlaidy dalanews.kz.
– Zańǵa sáikes, Quryltai sailaýynan soń Úkimet jumysyn toqtatýǵa tiis. Soǵan sai Ministrler kabineti jasaqtalady. Jańa Úkimettiń baǵyt-baǵdary men mindetteri jóninde ne aitasyz?
– Jalpy, Úkimet barynsha tabandy, jedel jumys atqaryp, Memleket basshysy qoiǵan mindetterdi oryndap otyr. Dúnie júzindegi básekelestik kúsheiip keledi. Naryqtyń syn-qaterlerine muqiiat nazar aýdaryp, eń bastysy, tiisti deńgeide tótep berýimiz kerek. Álbette, Úkimet otstavkaǵa ketedi. Úkimet quramynda birqatar ózgeris bolady. Ashyǵyn aitqanda, dál búgin Úkimet jumysyna alańdaýǵa nemese oǵan syn aitýǵa qandai da bir negiz joq. Ministrler de, Úkimet jetekshisi de qoldan kelgenshe mindetterin atqaryp jatyr. Biraq kadrlyq ózgerister árdaiym bolady. Óitkeni bul Úkimettiń jumysyna qan júgirtedi. Másele bireýdi ornynan bosatýda emes. Men jai syltaýmen jumystan shyǵarýǵa qashanda qarsymyn. Ásirese, qazirgi tilmen aitqanda, mediadaǵy kontent nemese mazmun úshin aýys-túiis jasaýdyń qajeti joq. Kadrlyq sheshim shyn máninde jumysqa tyń serpin berýi kerek. Bárimiz aityp júrgen jańǵyrý úderisi úzdiksiz júrgizilýge tiis. Óitkeni bul kúrdeli protsesti alǵa jetelep otyrý qajet. Bul iste Úkimet mańyzdy ról atqarady.
