Áleýmettik jelide qazaqstandyq ónertapqysh Ǵalymjan Ǵabdreshov ázirlegen SEZUAL eholokatsiialyq kórý tehnologiiasyna memlekettik deńgeide qoldaý kórsetilmegeni týraly jazba tarady. Joba avtorynyń málimdeýinshe, atalǵan tehnologiia kórý qabiletinen aiyrylǵan adamdardyń keńistikti baǵdarlaýyna kómektesýge baǵyttalǵan, dep habarlaidy dalanews.kz.
Jariialanǵan videoda startaptyń álemdik naryqtaǵy áleýeti 15 trillion dollarǵa deiin baǵalanatyny aitylǵan. Biznes-jospardaǵy esep boiynsha, álemde 300 millionǵa jýyq zaǵip jáne nashar kóretin adam bar. Joba osy naryqtyń 10 paiyzyn qamtyǵan jaǵdaida, onyń jalpy tabysy 1,5 trillion dollarǵa, al jyldyq ortasha túsimi 150 milliard dollarǵa jetýi múmkin degen boljam jasalǵan.
Joba ókilderi SEZUAL tehnologiiasynyń negizinde Astanada halyqaralyq ortalyq quryp, ázirlemeni Apple jáne Meta sekildi iri tehnologiialyq kompaniialarǵa usynýǵa múmkindik bolǵanyn málimdedi. Alaida olardyń sózinshe, bastama memlekettik organdar tarapynan tiisti qoldaý tappaǵan. Sondai-aq áleýmettik jelilerde startapqa qarsy qysym men kedergi áli jalǵasyp jatqany aitylǵan.
Qarjylandyrý bolmaǵandyqtan, Ǵalymjan Ǵabdreshov qazir qurylys salasynda jumys istep, tapqan qarajatyna qurylǵysyn jetildirip júrgeni habarlandy. Ónertapqysh jobany damytý jáne kórý qabileti nashar adamdarǵa kómektesý úshin ashyq qor qurǵan.
Bul jaǵdai Threads qoldanýshylarynyń da nazaryn aýdardy. Oqyrmandardyń biri memlekettik organdardyń ónertapqyshqa qatysty áreketin qatań synǵa aldy.
"Buryn bir adam búkil halyqtyń aldynda uiatqa qalatyn jaǵdailar bolýshy edi. Al tutas úkimettiń bir adamnyń aldynda uiatqa qalýy buryn-sońdy bolmaǵan shyǵar", - dep jazdy jeli qoldanýshysy.
Aita keteiik, Ǵalymjan Ǵabdreshov - halyqaralyq World Summit Awards (WSA) syilyǵynyń laýreaty. Ónertapqyshtyń aitýynsha, 2023 jyly onyń "Zaǵip jandarǵa arnalǵan kórý júiesi" jáne "Brail álippesin óz betinshe úiretetin qural" jobalary 182 eldiń ókilderi qatysqan halyqaralyq baiqaýda birinshi oryn ielengen.
