Qazaqstan Úkimeti 2027-2029 jyldarǵa arnalǵan áleýmettik-ekonomikalyq damý boljamyn jáne respýblikalyq biýdjet jobasyn maquldady. Tiisti sheshim Úkimet otyrysynda qabyldandy, dep habarlaidy dalanews.kz.
Premer-ministr Oljas Bektenov biýdjet qarajatyn barynsha tiimdi ári ýaqtyly igerýdi, aǵymdaǵy shyǵystardyń ulǵaiýyna jol bermeýdi jáne shyǵyndarǵa qatań baqylaý ornatýdy tapsyrdy.
«Mańyzdysy, biýdjet qarajatyn barynsha tiimdi jáne ýaqtyly paidalaný, aǵymdaǵy shyǵystardyń ulǵaiýyna jol bermeý, sondai-aq shyǵyndarǵa qatań baqylaý ornatý qajet. Talqylaý qorytyndysyn eskere otyryp, 2027-2029 jyldarǵa arnalǵan áleýmettik-ekonomikalyq damý boljamyn maquldaýdy usynamyn», - dedi Oljas Bektenov.
Úkimet basshysy Qarjy jáne Ulttyq ekonomika ministrlikterine Úkimet apparatymen birlesip, tiisti zań jobasyn Quryltaiǵa engizýdi tapsyrdy. Jumystardy úilestirý Premer-ministrdiń orynbasary, Ulttyq ekonomika ministri Serik Jumanǵaringe júkteldi.
Úkimet málimetinshe, 2027 jyly áleýmettik sala men ekonomikanyń naqty sektoryna 14,4 trln teńgeden astam qarajat baǵyttaý josparlanyp otyr.
Qarjy ministri Mádi Tákievtiń aitýynsha, 2027 jylǵa arnalǵan respýblikalyq biýdjet jobasyndaǵy negizgi shyǵys baǵyttary memlekettiń áleýmettik mindettemelerin oryndaý jáne infraqurylymdyq áleýetti damytý bolady.
Áleýmettik salany qarjylandyrýǵa 10,5 trln teńge, iaǵni biýdjet shyǵystarynyń jalpy kóleminiń 34,9%-y qarastyrylǵan. Alýshylar sanynyń ózgerýi jáne áleýmettik tólemderdi indeksatsiialaý eskerilip, halyqty qoldaýǵa qosymsha 739 mlrd teńge bólinedi.
«Ekonomikanyń naqty sektoryn qoldaýǵa arnalǵan biýdjet shyǵystary 3,8 trln teńgeni quraidy. Bul jalpy shyǵystardyń 12,9%-y jáne aǵymdaǵy jyldaǵy deńgeiden 507 mlrd teńgege artyq. Ósim negizinen el ekonomikasy úshin júieli mańyzy bar infraqurylymdyq jobalardy iske asyrýdy jalǵastyrýǵa bailanysty. Jalpy, óńirlerdiń damý biýdjetterin eskergende naqty sektordy qoldaýǵa jumsalatyn shyǵystar shamamen 7 trln teńgeni quraidy», - dedi Mádi Tákiev.
Memleket basshysynyń tapsyrmasyna sáikes, 2027-2029 jyldarǵa arnalǵan biýdjette infraqurylymdyq jáne áleýmettik nysandardy ozyq qarqynmen salýdy qamtamasyz etý kózdelgen.
Oljas Bektenov árbir jumsalǵan teńgeniń qaitarymyn arttyryp, qarjylyq tártipti kúsheitýdi tapsyrdy. Onyń aitýynsha, ekonomikalyq ósimniń belgilengen kórsetkishterine qol jetkizý jáne biýdjet qarajatyn tiimdi paidalaný máseleleri Memleket basshysy Qasym-Jomart Toqaevtyń turaqty baqylaýynda.
«Memleket basshysy ekonomikalyq ósim boiynsha belgilengen kórsetkishterge qol jetkizýdi jáne biýdjet qarajatyn tiimdi paidalanýdy turaqty baqylaýda ustaidy. Jeti aidyń qorytyndysy boiynsha ekonomikanyń ósimi 4,1%-dy qurady. Jyl qorytyndysynda JIÓ ósimin keminde 5% deńgeiinde qamtamasyz etýimiz qajet. Boljam ekonomikadaǵy qazirgi jaǵdaidy, syrtqy damý faktorlaryn, halyqaralyq qarjy uiymdarynyń álemdik ekonomikanyń ósýi men syrtqy naryqtardaǵy ahýalǵa qatysty baǵalaýyn eskeredi. Respýblikalyq biýdjet týraly zań jobasy halyqty áleýmettik qamtamasyz etý mindetterin sheshýmen jáne ekonomikalyq ósimdi yntalandyrýmen qatar makroekonomikalyq turaqtylyqty saqtaýdy eskere otyryp qalyptastyryldy», - dedi Oljas Bektenov.
2027-2029 jyldarǵa arnalǵan biýdjet saiasatynyń negizgi basymdyǵy infraqurylymdyq jáne áleýmettik nysandardy ozyq qarqynmen salý bolyp belgilendi. Memlekettik resýrstar halyq aldyndaǵy mindettemelerdi oryndaýǵa jáne óńirlerdi damytýǵa baǵyttalýy tiis.
«Memleket basshysynyń tapsyrmasy boiynsha 2027-2029 jyldarǵa arnalǵan biýdjetterdiń negizgi basymdyqtarynyń biri infraqurylymdyq jáne áleýmettik nysandardy ozyq qarqynmen salý bolyp tabylady. Barlyq memlekettik organǵa eldiń áleýmettik-ekonomikalyq damýynyń belgilengen parametrlerine qol jetkizýdi qamtamasyz etýdi tapsyramyn. Biýdjettik baǵdarlamalardyń barlyq ákimshileriniń mindeti - jumsalǵan árbir teńgeniń qaitarymyn arttyrý, qarjylyq tártipti kúsheitý jáne resýrstardy memlekettik mindettemelerdi oryndaýǵa, ekonomikany, óńirlerdi jáne adami kapitaldy damytýǵa baǵyttaý», - dep tapsyrdy Premer-ministr.
