Túrki memleketteri Parlamenttik Assambleiasynyń halyqaralyq missiiasy Qazaqstandaǵy Quryltai sailaýynyń ulttyq zańnama men halyqaralyq talaptarǵa sai, birqalypty jaǵdaida ótkenin málimdedi. Missiia músheleri Almatydaǵy sailaý ýchaskelerin aralap, daýys berý jáne daýystardy sanaý barysyn qadaǵalady. Sonymen qatar múmkindigi shekteýli azamattardyń sailaýǵa qatysýyna qandai jaǵdai jasalǵanyna nazar aýdardy. Qyrǵyzstan, Ázirbaijan jáne Túrkiia ókilderi sapar qorytyndysyn Almatyda ótken baspasóz máslihatynda jariialady, dep habarlaidy dalanews.kz.
TúrkPA-nyń Bilim, mádeniet, áleýmettik jáne gýmanitarlyq máseleler jónindegi komissiiasy tóraǵasynyń mindetin atqarýshy, Qyrǵyz Respýblikasy Jogorký Keńeshiniń depýtaty Ulyqbek Qarybek ýýlý halyqaralyq baiqaýshylardyń sailaý ýchaskelerin erkin aralap, ondaǵy jumys barysymen tanysýyna barlyq múmkindik jasalǵanyn aitty.
«Jumysymyzǵa memlekettik organdar tarapynan eshqandai kedergi bolǵan joq. Sailaý ýchaskelerine erkin kirip, bizdi qyzyqtyrǵan barlyq jaǵdaiatty óz kózimizben kórip, baqyladyq. Keshkisin daýys sanaý barysyna da kýá boldyq. Daýys berý ashyq ótti. Ulttyq zańnama men halyqaralyq talaptarǵa qaishy áreketterdi baiqamadyq», – dedi Ulyqbek Qarybek ýýlý.
TMPA-nyń Quqyqtyq máseleler jáne halyqaralyq qatynastar jónindegi komissiiasynyń múshesi, Túrkiia Uly Ulttyq Májilisiniń depýtaty Filiz Kylych halyqaralyq missiianyń baiqaý nátijelerine toqtaldy.
«Biz barǵan ýchaskelerde daýys berý birqalypty ári asqan uiymshyldyqpen ótti. Sailaýshylar erkin kelip, tańdaýyn esh kedergisiz jasady. Daýys berý qupiiasy saqtalyp, zańda belgilengen tártip talaptary oryndaldy. Baiqaý nátijesinde Almatydaǵy top Quryltai sailaýy Qazaqstan Respýblikasynyń zańnamasy men halyqaralyq sailaý talaptaryna sai ótti degen tujyrymǵa keldi», – dedi Filiz Kylych.
TúrkPA-nyń Bilim, mádeniet, áleýmettik jáne gýmanitarlyq máseleler jónindegi komissiiasynyń múshesi, Ázirbaijan Milli Májilisiniń depýtaty Hikmet Mamedov missiia músheleriniń alty sailaý ýchaskesin aralaǵanyn aitty. Ol Qazaqstannyń jańa zań shyǵarýshy organyna «Quryltai» atalýyna da erekshe mán berdi.
«Quryltai – tamyry tereń kóne túrki sózi. Babalarymyz eldik mańyzy bar máselelerdi aqyldasyp, ortaq sheshimge kelý úshin quryltaiǵa jinalǵan. Búginde osy mindetti Parlament atqarady. Al «Quryltai» ataýy halyqtyń erkin, eldik máselelerdi sheshýge atsalysýyn bildiredi. Qazaqstannyń joǵary zań shyǵarýshy organyna osyndai tarihi ataý berilgenine shyn júrekten qýanyshtymyn», – dep Hikmet Mamedov óziniń júrekjardy lebizin bildirdi.
Halyqaralyq baiqaýshylar múmkindigi shekteýli azamattardyń sailaýǵa qatysýyna jasalǵan jaǵdaiǵa da nazar aýdardy. Sailaý ýchaskeleri pandýstarmen jabdyqtalyp, Brail qarpindegi arnaiy úlgiler men ózge de kómekshi quraldar qarastyrylǵan. Ortalyq sailaý komissiiasynyń aqparattyq materialdary men otyrystary da ymdaý tiline aýdarylǵan.
Missiia músheleri áielder, jastar jáne múmkindigi shekteýli azamattardyń ókildigin qamtamasyz etýge baǵyttalǵan zańnamalyq talaptarǵa da toqtaldy. Zań boiynsha atalǵan úsh sanattyń partiialyq tizimdegi jalpy úlesi keminde 30 paiyz bolýy kerek. Bul talap depýtattyq mandattardy bólý kezinde de qoldanylady.
TúrkPA Bas hatshysy orynbasarynyń mindetin atqarýshy, Qyrǵyz Respýblikasy parlamentiniń ókili Bektur Bazakechov missiia jumysynyń táýelsizdik pen beitaraptyq qaǵidattaryna negizdelgenin aitty.
«Sailaý barysyna aralaspaý jáne onyń qatysýshylaryna saiasi turǵydan baǵa bermeý Halyqaralyq baiqaýshynyń basty ustanymy. Bizdiń mindetimiz – sailaýdyń el zańnamasy men memlekettiń halyqaralyq mindettemelerine qanshalyqty sai ótkenine ádil baǵa berý. Osy jumys barysynda biz beitaraptyqty, derbestikti, jariialylyqty jáne sailaý barysyna aralaspaý qaǵidatyn ustandyq. Bul sailaý Qazaqstannyń saiasi institýttaryn odan ári damytý jolyndaǵy mańyzdy kezeń boldy», – dedi Bektur Bazakechov.
TúrkPA ókilderi halyqaralyq baqylaýshylardyń jumysyna yńǵaily jaǵdai jasaǵany úshin Qazaqstan tarapyna alǵys bildirip, el azamattaryn tuńǵysh bir palataly Quryltaidyń qurylýymen quttyqtady.
