Túrkistanda «Balýan sholaq» filminiń premerasy ótti
Túrkistan qalasyndaǵy Q.A.Iasaýi atyndaǵy halyqaralyq qazaq-túrik ýniversitetiniń mádeniet ortalyǵynda «Balýan Sholaq» filminiń kórsetilimi ótti. Filmdi QR Mádeniet jáne sport ministrliginiń tapsyrysy boiynsha Sh.Aimanov atyndaǵy «Qazaqfilm» kinostýdiiasy túsirgen. Filmniń rejisseri – Nurgeldi Sadyǵulov. Tarihi kinolenta palýan, ánshi ári kompozitor Balýan Sholaqqa arnalǵan.
Qazaq sal-serileriniń sońǵy tuiaǵy, tarihta «Balýan Sholaq» degen atpen belgili ózi balýan, ári aqyn ári seri Nurmaǵanbet Baimyrzauly jaiyndaǵy filmde azamattyń el basyna qiyn-qystaý kún týǵan shaqta jasaǵan erligi baian etiledi. Stsenariidegi negizgi oqiǵa orys pereselenderiniń qazaq dalasyna kóshirilgen sátimen, sol ǵasyrdaǵy qazaq qoǵamyndaǵy qiyn kezeńmen órnektelgen. Film Balýan Sholaqtyń túrmede jatqan týǵan-týys, baýyrlaryn bosatyp, ádildikke qol jetkizýimen aiaqtalady. Filmde qazaq qoǵamynyń otarshyldyqqa qarsy kózqarasy, kúresi kórinis tapqan.
Ataqty balýannyń rólin Erkebulan Daiyrov somdaǵan. Sonymen qatar Albina Shardarova, Medǵat Ómiráliev, Aleksandr Bagriantsev syndy akterlardy kóre alamyz.
«Balýan Sholaq» filminiń ideia avtory, ári stsenariiin jazǵan oblysymyzdyń týmasy memlekettik syilyqtyń iegeri, jazýshy, dramatýrg – Dýlat Isabekov.
Kórsetilim barysynda rejisserlyq top túrkistanyq kórermenmen jáne jastarmen kezdesti. Dýlat Isabekov "Balýan Sholaq" filmin óziniń kino salasyndaǵy eń tabysty jobalarynyń biri ekenin aitty. Al film rejisseri Nurgeldi Sadyǵulov bul týyndy qazaq jastarynyń otanshyldyq sezimin oiatatynyna senim bildirdi. Túrkistan oblysy ákiminiń orynbasary Málik Otarbaev film rejisseri men stsenarii avtoryna jáne shyǵarmashylyq topqa alǵysyn aityp, oblys ákimi atynan syi-siiapat jasady. Atalǵan filmdi Qazaqstanmen birge túrki álemine de taratý kerektigin aitty. Kesh sońynda Túrkistannyń ónersúier qaýymy Dýlat Isabekovpen estelik sýretke túsip, qoltańbasyn aldy.
