Prezident Qasym-Jomart Toqaev Aqordada halyqaralyq pán olimpiadalarynda jeńimpaz atanyp, júldeli oryndarǵa ie bolǵan oqýshylarmen jáne stýdenttermen kezdesti, dep habarlaidy dalanews.kz.
"Biyl oqýshylarymyz 44 halyqaralyq olimpiada men ǵylymi saiysqa qatysyp, myńnan astam medal jeńip aldy. Onyń 200-den astamy – altyn medal. Muny tamasha jetistik deýge bolady. Osy tusta halyqaralyq fizika olimpiadasynda keremet óner kórsetken oqýshylardy erekshe atap ótkim keledi. Bedeldi básekege qatysqan bes talapkerimizdiń beseýi de altyn medal alyp, jeńimpaz atandy. Bul – buryn-sońdy bolmaǵan biregei kórsetkish. Jalpy, biz barlyq baǵyttar boiynsha osyndai úzdik nátijege umtylýymyz kerek. Qazaqstan jastarynyń áleýeti oǵan tolyq jetedi", – dedi Qasym-Jomart Toqaev.
Prezident qazir elimiz tarihi órleý kezeńine qadam basqanyna nazar aýdardy.
"Biz bir el, bir halyq bolyp aýqymdy reformalardy júzege asyrdyq. Jańa Konstitýtsiiamyzdy qabyldadyq. Elimizdiń bas qujatynda ǵylym men bilimge, innovatsiiaǵa basymdyq berdik. Eń bastysy, jańa Konstitýtsiia óskeleń urpaqtyń igiligi úshin jazyldy. Keshe ǵana tarihymyzda tuńǵysh ret Quryltai sailaýy ótti. Bul sailaý sátti, minsiz uiymdastyryldy dep aitsaq, qate bolmas. Osy múmkindikti paidalanyp, búkil halqymyzǵa azamattyq kemeldik tanytyp, jańarý strategiiamyzdy qoldaǵany úshin myń da bir alǵysymdy aitamyn. Sailaý kezinde bir top baiqaýshylar, sonyń ishinde halyqaralyq baiqaýshylar óte tiimdi jumys istedi. Olarǵa da zor rizashylyǵymdy bildiremin. Sondai-aq Ortalyq sailaý komissiiasynyń múshelerine rahmetimdi aitamyn. Olar óte tabandy qyzmet atqardy", – dedi Qasym-Jomart Toqaev.
