21 sáýir kúni tańerteń Teńiz kenishinde jumys isteitin «Kásibi tańdaý» JShS qoima qyzmetkerleri eńbekaqyny 50%-ǵa ósirýdi talap etip shyqty. Olardyń úndeýin qoldap, kólik bóliminiń qyzmetkerleri de jalaqyny eki ese kóterýdi surap otyr, dep habarlaidy Dalanews.kz Aqjaiyqqa silteme jasap.
Eske sala keteiik, «Kásibi tańdaý» JShS – TShO-nyń merdigeri sanalatyn Caspian Offshore Construction Realty (COCR) kompaniiasynyń qosalqy merdigeri. COCR – Teńiz kenishinde tasymal qyzmetin kórsetetin negizgi merdiger uiymdardyń biri. «Kásibi tańdaý» kompaniiasy 2021 jyly tirkelgen, sońǵy ret qaita tirkeýden biyl 15 sáýir kúni ótken.
TShO kólik departamentiniń qyzmetkerleri buǵan deiin, 17 sáýir kúni, kompaniia basshylyǵyna resmi túrde jazbasha úndeý joldaǵan edi. Hat TShO-nyń bas direktory Ýiliam Lakobi, COCR-diń bas direktory Adjai Maik jáne «Kásibi tańdaý» basshysy Ainur Smitke arnalǵan. Qyzmetkerlerdiń sózinshe, infliatsiianyń kúrt ósýi, tutyný baǵasynyń qymbattaýy jáne kúnkóris deńgeiiniń kóterilýi qazirgi jalaqymen kúneltýge múmkindik bermeidi. Olar eńbekaqynyń kóterilýi qyzmetkerlerdiń jumys sapasy men jaýapkershiligin arttyratynyn da atap ótken.
Qyzmetkerler búgin óz talaptaryn videoúndeý arqyly da jetkizip, kompaniia basshylyǵynan eshqandai repressivtik áreket jasamaýdy surady. Qazirgi málimet boiynsha, bul úndeýge 140-tan astam adam qol qoiǵan.
Oqiǵa ornynda qazir kelissózder júrip jatyr. Taraptar arasynda dialog ornatý úshin aýdan ákiminiń orynbasary Gúlnafiz Aishýaqova, aýdan prokýrory Erkebulan Ermekov jáne memlekettik eńbek inspektsiiasynyń basshysy Igilik Áýbekerov bardy. Qoǵamdyq tártipti politsiia baqylaýda. Búgingi kún talap qoiýǵa bailanysty jumys kúni bolyp eseptelmeidi.
TShO-nyń baspasóz qyzmeti atalǵan másele boiynsha resmi túrde: «Teńizshevroil bul jaǵdaidan habardar. Degenmen TShO merdigerleri táýelsiz zańdy tulǵa bolyp tabylady. Sondyqtan týyndaǵan máseleler boiynsha «Kásibi tańdaý» kompaniiasyna tikelei habarlasý qajet. TShO Qazaqstan Respýblikasynyń zańnamasyn qatań saqtaidy», – degen málimdeme jasady.
Ázirge COCR men «Kásibi tańdaý» kompaniialary resmi jaýap bergen joq. Al eńbek inspektsiiasynyń ókilderi kenishte taraptar kelissóz ústinde ekenin rastady.
Kásipodaq sarapshylarynyń aitýynsha, mundai eńbek daýlary ádette ne jumysshylardyń ereýilimen, ne jappai jumystan shyǵarýmen aiaqtalady. Talaptardyń sońy ne bolary ázirge belgisiz.
