Tele2 Kazakhstan brendimen jumys isteitin "Mobail Telekom-Servis" JShS-niń burynǵy qyzmetkeri Denis Jornov jeke derekterdiń jariialanýyna bailanysty jumystan shyǵarylǵan. Kompaniiada 15 jyl eńbek etken maman bul sheshimdi zańsyz dep sanap, sotqa júginýge nietti, dep habarlaidy dalanews.kz.
Hronika.kz basylymynyń málimetinshe, Denis Jornov kompaniiada eńbekaqyny esepteý jáne qyzmetkerlerdi basqarýǵa arnalǵan "1S:ZÝP" baǵdarlamasyn engizýge jaýapty bolǵan. Daý osy jobany iske asyrý kezinde merdiger uiym qyzmetkeriniń kompaniianyń aqparattyq júiesine qashyqtan kirýinen týyndaǵan.
2026 jylǵy 2 aqpanda aqparattyq qaýipsizdik qyzmeti merdiger mamanynyń júiedegi málimetterdi qaraǵanyn anyqtaǵan. Qyzmettik tekserý materialdarynda qashyqtan qosylý kezinde onyń kompiýter ekranyn sýretke túsirgen bolýy múmkin ekeni kórsetilgen.
Jornov derekter bazasyn bógde adamǵa óz betinshe bermegenin aitady. Onyń sózinshe, merdigerge qashyqtan kirýge kompaniianyń aqparattyq qaýipsizdik qyzmeti aldyn ala ruqsat bergen. Merdiger qupiia aqparatty jariialamaý týraly mindettemege de qol qoiǵan.
"Derekterdi kóshirý joba boiynsha jasalǵan kelisimde qarastyrylǵan. Qujatta personaldyq málimetter men ortasha jalaqy týraly aqparatty jańa júiege kóshirý qajettigi kórsetilgen", - deidi burynǵy qyzmetker.
Oqiǵadan keiin, 26 aqpanda kompaniiada qyzmettik tekserý bastalǵan. Naýryz aiynyń basynda Jornovtan jazbasha túsinikteme talap etilip, ol óz ustanymyn jobanyń bekitilgen qujattaryna súiene otyryp túsindirgen.
Alaida 29 mamyrda onymen jasalǵan eńbek sharty buzyldy. Jumystan shyǵarýǵa Eńbek kodeksiniń 52-baby 1-tarmaǵynyń 15-tarmaqshasy, iaǵni zańmen qorǵalatyn qupiiany jariia etý negiz bolǵan.
Jornov daýǵa sebep bolǵan áreketti merdiger uiymnyń qyzmetkeri jasaǵanyn alǵa tartady. Onyń aitýynsha, ruqsatsyz kirý týraly aqparat túskennen keiin merdigerdiń júiege qoljetimdiligi onyń tapsyrmasymen buǵattalǵan.
Osy kezeńde mamanǵa «1S» júiesiniń jumysyna qatysty taǵy bir qatań sógis jariialanǵan. Keiin kelisý komissiiasy qyzmetkerdiń kinásin rastaityn dálelder jetkiliksiz degen qorytyndyǵa kelip, bul jazany tolyq joiǵan. Alaida «1S:ZÝP» jobasyna bailanysty jumystan shyǵarý týraly sheshim kúshinde qalǵan.
Burynǵy qyzmetker eńbek inspektsiiasyna da júgingen. Alaida vedomstvo zańbuzýshylyq anyqtamaǵan. Osydan keiin ol prokýratýraǵa shaǵym túsirgen.
Jornov tártiptik jazany qoldaný merzimi de saqtalmaǵan dep esepteidi. Merdiger tarapynan jasalǵan áreket 2 aqpanda anyqtalǵanymen, jumystan shyǵarý týraly buiryq 29 mamyrda qabyldanǵan. Bul ýájge túpkilikti quqyqtyq baǵany sot beredi.
«Kompaniiada 15 jyl jumys istedim. Osy ýaqyt ishinde maǵan birde-bir tártiptik jaza nemese basshylyq tarapynan eskertý jasalǵan emes. Endi óz bedelimdi qorǵap, jumystan shyǵarý týraly buiryqtyń kúshin joiý úshin sotqa júginýge májbúrmin», – dedi Denis Jornov.
Onyń sózinshe, qupiia aqparatty jariialady degen negizben jumystan shyǵarý kásibi bedeline nuqsan keltirip, keiin basqa jumysqa ornalasýyna kedergi keltirýi múmkin.
Hronika.kz málimetinshe, «Mobail Telekom-Servis» kompaniiasy osy jaǵdaiǵa qatysty jýrnalisterdiń saýaldaryna jaýap bermegen. Endi eńbek daýyna bailanysty taraptardyń dálelderin sot qaraidy.
