Astanada ótken AI Digital Qazaqstan 2026 halyqaralyq forýmynda Densaýlyq saqtaý vitse-ministri retinde Beibit Sálimov esimdi azamat tanystyryldy. Hronika.kz basylymy onyń 2024 jylǵy naýryzda qyzmetinen bosatylǵan burynǵy vitse-ministr Beibit Esenbaev bolýy múmkin ekenin jazdy, dep habarlaidy dalanews.kz.
Basylym jariialaǵan málimetke sáikes, Beibit Sálimov pen Beibit Esenbaevtyń syrt kelbeti bir-birine qatty uqsaidy. Osyǵan bailanysty avtor burynǵy sheneýnik tegin aýystyryp, ministrliktegi qyzmetine qaita oraldy degen boljam aitqan. Alaida bul aqparatqa qatysty Densaýlyq saqtaý ministrligi ázirge resmi túsinikteme bergen joq.
Beibit Esenbaev 2024 jylǵy naýryzda densaýlyq saqtaý vitse-ministri qyzmetinen bosatylǵan. Sol kezde ministr Aqmaral Álnazarova Májiliste densaýlyq saqtaý salasyndaǵy tsifrlyq júielerdiń jumysyna syn aitqan edi.
"Kez kelgen másele ashyqtyqty talap etedi. Sońǵy bes jyldyń ózinde osy maqsattarǵa 15 milliard teńgeden astam qarajat bólindi. Alaida nátije joqtyń qasy. Birde-bir júie tolyqqandy jumys istemeidi jáne sala resýrstarynyń paidalanylýyn basqarýda qajetti ashyqtyqty qamtamasyz ete almai otyr", - degen edi ministr.
Birtanov isindegi kýáger
Hronika.kz málimetinshe, Beibit Esenbaev burynǵy densaýlyq saqtaý ministri Eljan Birtanov pen eks-vitse-ministr Oljas Ábishevke qatysty is boiynsha kýáger bolǵan.
Basylym Esenbaevtyń tergeý kezinde Birtanov pen Ábishevtiń áńgimelerin arnaiy qurylǵyǵa jazyp júrgenin habarlady. Onyń sotta bul qurylǵyny Qarjylyq monitoring agenttiginiń qyzmetkerleri bergenin aitqany kórsetilgen.
Eljan Birtanov pen Oljas Ábishev 2022 jylǵy qazanda qyzmettik ókilettikterin asyra paidalandy dep tanylǵan. Is eldegi meditsinalyq aqparattyq júielerdi biriktirýge arnalǵan interoperabeldik platformasyna qatysty boldy.
Joba 2019 jyly Qazaqstandaǵy ártúrli meditsinalyq júielerdegi aqparatty bir arnaǵa jinaýǵa tiis edi. Ol synaq rejiminde iske qosylǵan kezde dári-dármek ainalymyndaǵy birqatar kúmándi derek anyqtalǵan.
Oljas Ábishevtiń aitýynsha, júie arqyly tegin dári alǵany kórsetilgen azamattarǵa SMS habarlama jiberilgen. Eki million adam dári-dármekti alǵanyn rastaǵanymen, qalǵan bir million adamnyń arasynda qaitys bolǵan, azamattyǵyn aýystyryp, elden kóship ketken jáne deni saý adamdar bolǵan.
"Esepten shyǵarylǵan dáriler Shymkenttegi qoimadan tabyldy. Tipti ústinde “tegin” degen jazýy bar preparattar Ózbekstanda, Qyrǵyzstanda jáne Reseide satylǵan. Seriialyq nómiri arqyly bul dárilerdiń memlekettik tapsyryspen Ońtústik Qazaqstan oblysyna alynǵanyn anyqtadyq", - degen Oljas Ábishev.
Onyń sózinshe, 2018 jylǵy qańtarda tegin dári taratqan dárihanalarǵa júrgizilgen tekserý barysynda 2017 jylǵy jeltoqsanda turǵyndarǵa berildi dep kórsetilgen tórt milliard teńgeniń preparaty qoimalardan tabylǵan.
Hronika.kz bul Birtanov isine qatysy bar adamnyń tegin aýystyrýyna qatysty ekinshi jaǵdai ekenin atap ótti. Buǵan deiin Oljas Ábishev Qarjylyq monitoring komitetiniń qyzmetkeri Aslan Álimov keiin Aslan Keńes degen aty-jónmen Qyzylorda oblysy boiynsha Ekonomikalyq tergeý departamentiniń basshysy bolǵanyn aitqan.
Atalǵan jaǵdai boiynsha Dalanews.kz aqparat agegttigi Densaýlyq saqtaý ministrligine saýal joldady.
