Qazaqstan quramasy ártistik júzýden jasóspirimder arasyndaǵy 2026 jylǵy álem chempionatynda bir kúnde eki kúmis medal jeńip aldy, dep habarlaidy dalanews.kz.
Aralas dýetterdiń erkin baǵdarlamasynda Iasmina Islamova men Aldiiar Ramazanov 248,1058 upai jinap, ekinshi oryn ielendi. Bul synda Ispaniia ókilderi Arlet Arnan Santakrýs pen Eneko Sanches Agilar 263,2992 upaimen jeńiske jetti. Al japoniialyq Heizo Aitaka men Manami Dodo 246,9850 upai jinap, qola medal aldy.
Islamova men Ramazanovtyń bul jetistigi Qazaqstan úshin tarihi nátije boldy. Sebebi buǵan deiin el sportshylary jasóspirimder arasyndaǵy álem chempionatynda mikst-dýet baǵdarlamasynan júlde alyp kórmegen.
Qazaqstan quramasy akrobatika baǵdarlamasynda da kúmis medal ielendi. Ulttyq komanda 203,0926 upai jinap, ekinshi orynǵa turaqtady.
Bul saiysta el namysyn Sofiia Ishenko, Iasmina Islamova, Daiana Jamanchalova, Maqpal Qalmýrza, Polina Merzliakova, Aldiiar Ramazanov, Aiǵanym Saiym jáne Anastasiia Voronkova qorǵady.
Akrobatika baǵdarlamasynda Resei quramasy 232,2147 upaimen altyn júldege ie boldy. Belarýs komandasy 200,9777 upai jinap, úshinshi oryn aldy.
