Shymkentte jol-kólik oqiǵasynan keiingi janjal, adam urlaý jáne adam ólimine qatysty qylmystyq is boiynsha sot protsesi bastaldy, dep habarlaidy dalanews.kz.
Oqiǵa 20 qańtarda kúndiz qalanyń adam kóp júretin joldarynyń birinde bolǵan. Aldymen eki kólik soqtyǵysyp, keiin júrgizýshiler arasynda janjal shyqqan. Birneshe minýttan soń oqiǵa ornyna taǵy bir kólik kelip, odan tórt adam túsken. Osylaisha joldyń boiynda 10 adam arasynda tóbeles bastalǵan.
Janjal barysynda pyshaq qoldanylyp, eki adam jaralanǵan. Alaida oqiǵanyń basty qurbany 40 jastaǵy Vasilii Kolesnikov boldy. Tergeý barysynda onyń buǵan deiin sottalǵany anyqtalǵan.
Kolesnikovty kúshpen kólikke otyrǵyzyp, qala syrtyna alyp ketken. Shamamen eki saǵattan keiin onyń pyshaq jaraqattarynan kóz jumǵan denesi Shymkentten 80 shaqyrym jerdegi Ordabasy aýdanynyń Temirlan aýylynan tabylǵan.
Qylmystyq is adam óltirý, buzaqylyq jáne adam urlaý baptary boiynsha tergelgen. Qazir sot aldynda alty adam jaýap berip jatyr. Protseske úsh jábirlenýshi qatysýda.
Olardyń qatarynda qaza tapqan Vasilii Kolesnikovtyń ákesi Aleksandr Kolesnikov te bar. Ol Shymkentte uzaq jyldar boiy grek-rim kúresinen jattyqtyrýshy bolyp eńbek etken, sport ardageri.
Bul is boiynsha taǵy eki kúdikti ázirge izdeýde júr. Olarǵa qatysty qylmystyq is jeke óndiriske bólingen.
