Soltústik Qazaqstan oblysynda júzý jattyqtyrýshysy kúshti áser etetin dárilerdi zańsyz saqtady degen kúdikpen ustaldy. Bul týraly Ishki ister ministrligi habarlady, dep habarlaidy dalanews.kz.
Vedomstvo málimetinshe, arnaiy is-shara barysynda elimiz boiynsha 1500-den astam meditsinalyq mekeme men dárihana, sondai-aq 142 ónerkásip kásiporny tekserilgen. Nátijesinde 249 ákimshilik quqyq buzýshylyq anyqtalǵan. Sonymen qatar quramynda esirtki zaty bar 28 myń dárilik preparattyń ainalymy shektelgen. Zańdy ainalymdaǵy himiialyq zattar men prekýrsorlardyń zańsyz naryqqa túsýine jol bermeý sharalary da qolǵa alynǵan.
IIM deregine sáikes, jalpy kólemi 675 tonna túrli prekýrsordyń ainalymyna shekteý qoiylyp, 90 zańdy tulǵa ákimshilik jaýapkershilikke tartylǵan. Máselen, Petropavl qalasynda júzý jattyqtyrýshysy ustalyp, odan kúshti áser etetin 56 tabletka tárkilengen.
Sondai-aq Túrkistandaǵy dárihanalardyń birinde litsenziiasyz kúshti áser etetin dárilerdi satý faktisi anyqtalǵan. Nátijesinde 5 myńnan astam tabletka tárkilendi. Al Oral qalasynda litsenziia talaptaryn buzǵany úshin 500 tonna tuz qyshqylynyń ainalymyna shekteý qoiylǵan.
