Shyǵys Qazaqstan oblysynda omartada jumys istep júrgen 58 jastaǵy er adamǵa aiý shabýyl jasady. Oqiǵa shildeniń sońynda Batys Altai memlekettik tabiǵi qoryǵyna jaqyn mańdaǵy demalys bazasynyń janynda bolǵan, dep habarlaidy dalanews.kz.
Kýágerlerdiń aitýynsha, aiý er adamǵa kenet tap bergen. Sol mańda bolǵan eki er adam oǵan aiýdan qorǵanýǵa kómektesken. Osydan keiin janýar oqiǵa ornynan qashyp ketken.
Zardap shekken er adam aýrýhanaǵa jetkizildi. Ol birneshe kún jansaqtaý bóliminde jatyp, keiin jaraqat bólimine aýystyrylǵan. Ridder qalalyq aýrýhanasy málimetinshe, er adamnyń basy, qoly men aiaǵynda kólemdi jaraqattar bolǵan. Sonymen qatar, qoly men aiaǵy synǵan, súiekter ornynan yǵysqan.
19 tamyzda er adam aýrýhanadan shyǵaryldy. Qazir ol úiinde em qabyldap jatyr.
Oqiǵa ornyna orman jáne ańshylyq sharýashylyǵynyń inspektorlary barǵan. Aiýdyń kózi joiylǵan.
