1 shilde kúni Beijińdegi Halyq jinalysy saraiynda Qytai Kommýnistik partiiasynyń qurylǵanyna 105 jyl tolýyna arnalǵan saltanatty jiyn ótti. Is-shara barysynda eldiń damýyna, qoǵamnyń órkendeýine jáne halyqtyń ál-aýqatyn arttyrýǵa erekshe úles qosqan azamattar marapattaldy, dep habarlaidy dalanews.kz.
Qytai Halyq Respýblikasynyń tóraǵasy, Ortalyq áskeri keńestiń tóraǵasy Si Tszinpin partiianyń eń joǵary marapaty sanalatyn «1 shilde» ordenin iegerlerge ózi tabystady. Biyl bul mártebeli nagradaǵa ie bolǵan 8 adamnyń qatarynda qazaq ultynyń ókili, ardager dáriger Oqas Súleimen de bar.
Oqas Súleimen uzaq jyldar boiy shekaralyq aimaqtardaǵy turǵyndarǵa meditsinalyq kómek kórsetip kelgen. Ol 40 jyldan astam ýaqytyn aýyl-aimaqty aralap, shalǵai qystaýlar men jailaýlardaǵy naýqastardy emdeýge arnaǵan. Qystyń qaqaǵan aiazy men jazdyń aptap ystyǵyna qaramastan, dárigerlik qobdishasyn serik etip, at ústinde júrip halyqqa qyzmet etken.
Ol Shyńjań-Uiǵyr avtonomiialyq aýdanyna qarasty Tarbaǵatai aimaǵy, Sháýeshek óńirindegi Dórbiljin aýdany mal sharýashylyǵy aýrýhanasynda ishki aýrýlar bóliminiń bas dárigeriniń orynbasary bolyp jumys istegen.
1975 jyldan beri Oqas Súleimen 100 myńnan astam naýqasqa em-dom júrgizgen. Sonymen qatar birneshe myń aýyr haldegi adamnyń ómirin saqtap qalyp, 3 200-den astam sábidiń dúniege aman kelýine kómektesken.
Aýyldyq meditsina salasyna sińirgen eńbegi úshin ol buǵan deiin de birqatar joǵary marapatqa ie bolǵan. Atap aitqanda, «Ulttyq densaýlyq saqtaý júiesiniń úzdik qyzmetkeri», «Qytaidyń 1 mamyr eńbek medali» jáne «Ulttar birligi men progresiniń úzdik qairatkeri» ataqtarymen marapattalǵan.
"1 shilde" ordeni – Qytai Kommýnistik partiiasynyń eń joǵary partiialyq marapaty. Ol 2017 jyldyń 22 shildesinde engizilgen. Bul orden bes jylda bir ret eldiń áleýmettik-ekonomikalyq damýyna airyqsha eńbek sińirgen partiia múshelerine beriledi.
Oqas Súleimen – osy joǵary marapatqa ie bolǵan tuńǵysh qazaq azamaty. Onyń ondaǵan jylǵa sozylǵan dárigerlik qyzmeti men shalǵaidaǵy halyqqa jasaǵan eńbegi Qytai biligi tarapynan osylaisha joǵary baǵalandy.
