Saılaý komısıasynyń tóraǵasy Vadım Gadylgareevtiń aıtýynsha, № 79 saılaý ýchaskesinde barlyǵy 2 myń 585 adam tirkelgen, onyń 3-i baqylaýshylardyń qatysýymen úıde daýys beretin bolady.
Sondaı-aq, ol qala turǵyndary tańerteńnen bastap daýys berýge belsendilik tanytyp jatqanyn atap ótti. Sonymen qatar, jastar da azamattyq ustanymyn kórsetip, jarqyn bolashaq úshin óz tańdaýlaryn jasaýǵa keldi. Daýys berý rásiminen keıin olarǵa alǵashqy azamattyq belsendilikterin tanytqandary úshin estelik kádesyılar tabystaldy.
Óskemen joǵary polıtehnıkalyq kolejiniń stýdenti Mádı Qudaıbergenev búgin osyndaı mańyzdy is-sharaǵa qatysyp qana qoımaı, óziniń 20 jasqa tolǵanyn atap ótýde. Bolashaqta ol muǵalim bolýǵa jáne memleketimizdiń damýy men órkendeýi úshin jumys isteýge nıetti.
"Iá, búgin meniń týǵan kúnim, men saılaýǵa birinshi ret kelip turmyn, búgin óz tańdaýymdy jasaımyn. Meniń oıymsha, ár adam óz eliniń bolashaǵy úshin daýys berýi kerek", - dedi jas jigit.
18 jastaǵy Abaı atyndaǵy Shyǵys Qazaqstan gýmanıtarlyq kolejiniń 2 kýrs stýdenti Aısulý Asylbekova óz ýchaskesine alǵashqylardyń biri bolyp keldi.
- Men saılaýǵa birinshi ret qatysyp otyrmyn, bul men úshin úlken mártebe. Men alǵa qoıǵan maqsattaryma jáne jarqyn bolashaǵyma daýys beremin. Saılaýǵa alǵash ret qatysqan stýdentter úshin tosyn syılar uıymdastyrylypty. Syılyq alǵanyma da qýanyshtymyn. Meniń oıymsha, bul kún meniń esimde máńgi saqtalady", - dep bólisti Aısulý Asylbekova.
Jastar barlyq turǵyndardy saılaý ýchaskelerine kelip, azamattyq boryshtaryn óteýge shaqyrdy. Esterińizge sala keteıik, qalada saǵat 20:00-ge deıin 112 ashyq saılaý ýchaskeleri jumys isteıtin bolady.
