Qazaqstan shekarasynda 10 kún ishinde janar-jaǵarmai materialdaryn (JJM) zańsyz tasymaldaýdyń 400-den astam áreketiniń joly kesildi, dep habarlaidy dalanews.kz.
Vedomstvo málimetinshe, UQK Shekara qyzmeti ótkizý beketterinde quqyqqa qaishy áreketterdi anyqtaý jáne olardyń aldyn alý boiynsha turaqty jumys júrgizip keledi.
«1–10 tamyz aralyǵynda shekara arqyly taýarlar men júkterdi zańsyz ótkizýdiń 551 deregi anyqtalyp, joly kesildi. Zańsyz tasymaldanbaq bolǵan júk quny 1 mlrd teńgeden asady. Onyń ishinde janar-jaǵarmai materialdaryn shetelge shyǵarýdyń 411 áreketi jáne halyq tutynatyn taýarlardy zańsyz alyp ótýdiń 140 faktisi tirkeldi», – delingen habarlamada.
UQK málimetinshe, quqyq buzýshylyqqa jol bergen azamattar Qazaqstan Respýblikasynyń qoldanystaǵy zańnamasyna sáikes jaýapkershilikke tartylǵan.
Komitet mundai zańsyz áreketterdiń jolyn kesý boiynsha jumystar jalǵasyp jatqanyn atap ótti.
