Bir kezderi álemniń sán podiýmdarynda júrip, áigili brendterdiń kiimderin kópshilikke tanystyrǵan Shyńǵys Tańatpaev búginde áskeri forma kiip, Ulttyq ulan qatarynda Otan aldyndaǵy boryshyn ótep júr, dep habarlaidy dalanews.kz Ulttyq ulannyń baspasóz qyzmetine siltep.
Qaraǵandydaǵy 5451 áskeri bóliminiń qatardaǵy jaýyngeri Shyńǵys Tańatpaev modeldik mansabyn 17 jasynda bastaǵan. Boiy men kelisti kelbeti ony sán indýstriiasyna jetelep, halyqaralyq podiýmdarǵa shyǵarǵan. Ol Frantsiianyń áigili Pierre Cardin sán úiiniń, Italiianyń Federico Barrazzo jáne Sauvage Multi brendteriniń kiimderin kórsetip, álemniń túrli elin sharlaǵan.
Al búginde ol áskerge kelip, podiýmdaǵy nyq qadam saptaǵy áskeri júriske aýysqan. Bir qaraǵanda, modeldik óner men áskeri qyzmettiń arasy jer men kóktei kórinýi múmkin. Alaida ekeýine de ortaq dúnie bar. Ol - tártip pen jinaqylyq. Podiýmda ózin erkin ári senimdi ustai bilý qajet bolsa, áskeri qyzmette de ár qimylǵa jaýapkershilikpen qarap, berilgen tapsyrmany dál oryndaý mańyzdy.
Sarbaz qazir Qaraǵandy qalasynyń qoǵamdyq qaýipsizdigin saqtaýǵa óz úlesin qosyp júr. Ol kún saiyn áskeri mindetin abyroimen atqaryp, buqaralyq is-sharalar kezinde jáne adam kóp shoǵyrlanǵan oryndarda qoǵamdyq tártip saqtalýyn qadaǵalaidy.
