Quryltai sailaýy qarsańynda Qazaqstan halyq partiiasynyń negizgi spikerleriniń biri retinde jii kózge túsken saiasatker Ermuhamed Ertisbaev belsendi saiasattan ketetinin jariialady, dep habarlaidy dalanews.kz.
Bul týraly ol áleýmettik jelidegi jazbasynda málimdedi. Ertisbaevtyń aitýynsha, Quryltai sailaýy aiaqtalyp, Qazaqstan halyq partiiasy resmi túrde 3 paiyzdan astam daýys jinaǵannan keiin óziniń saiasi qyzmetine qorytyndy jasaý týraly sheshim qabyldaǵan.
«Men belsendi saiasattan ketemin. Saiasi ómirbaianymdaǵy bul kezeń aiaqtaldy dep sanaimyn», – dedi ol.
Saiasatker Qazaqstan halyq partiiasynyń qazirgi tóraǵasy Nursultan Shoqanovtyń málimdemesin tolyq qoldaitynyn atap ótti. Onyń sózinshe, ózi eki aiǵa jýyq ýaqyt buryn partiia tóraǵasy qyzmetinen ketken, al qazir partiianyń jańa basshylyǵy men jańa mindetteri bar.
Ertisbaev sailaý naýqany kezinde partiia atynan eńbek etken azamattarǵa alǵys aityp, ózderi usynǵan qazaqstandyq sotsializm ideiasy qoǵam tarapynan kútken deńgeide qoldaý tappaǵanyn moiyndady.
«Biz áleýmettik ádilettilik, ulttyq bailyq, laiyqty qarttyq, eńbek quqyǵyn qorǵaý, qoljetimdi meditsina men bilim berý týraly aittyq. Qoǵam óz tańdaýyn jasady. Resmi nátije belgili boldy. Saiasatker tek kúrese bilmeýi kerek, sonymen qatar shyndyqty qabyldap, qorytyndy shyǵara bilýi tiis», – dep jazdy ol.
Onyń pikirinshe, qazaqstandyq sotsializm ideiasynyń keń qoldaý tappaýyna qoǵamnyń ázir bolmaýy nemese bul ideiany jetkilikti dárejede túsindire almaýy sebep bolýy múmkin. Sonymen qatar Ertisbaev aldaǵy ýaqytta ishki saiasattan góri halyqaralyq saiasat, tarih jáne saraptamalyq baǵyttaǵy jumystarǵa den qoimaq.
«Men úshin ishki saiasat ekinshi kezekke yǵysady. Negizgi baǵytym jýrnalistika, tarih, saiasattaný jáne aǵartýshylyq qyzmet bolady. AQSh, Qytai jáne Resei arasyndaǵy qatynastar, Eýropadaǵy úderister, Ortalyq Aziianyń bolashaǵy jáne Qazaqstannyń ózgerip jatqan álemdegi orny týraly halyqaralyq saraptamany kúsheitemiz», – dedi ol.
Sondai-aq saiasatker tarihqa arnalǵan jańa jobany iske qosýdy josparlap otyrǵanyn aitty. Onyń maqsaty – ótkendegi mańyzdy sheshimderdiń qazirgi ómirge áserin kórsetý. Jazbasynyń sońynda Ermuhamed Ertisbaev Qazaqstan halyq partiiasyna tabys tilep, jaqtastaryn sailaý nátijesine bola túńilmeýge shaqyrdy.
«Saiasatta jeńis te, jeńilis te bolady. Adamnyń ustanymy bir keshte televizor ekranynda paida bolǵan paiyzdarmen ólshenbeidi. Biz qoldan kelgenniń bárin jasadyq. Men úshin bul saiasi kezeń aiaqtaldy. Endi qorytyndy jasap, alǵa jyljý kerek», – dep túiindedi ol.
