Qyrǵyzstan prezidenti Sadyr Japarov kelesi prezidenttik sailaýǵa qatysyp, memleket basshysy qyzmetine ekinshi merzimge túsýge nietti ekenin aitty, dep habarlaidy dalanews.kz.
Bul týraly ol jýrnalist Ali Toktakýnovqa bergen suhbatynda málimdegen.
"Men taǵy bir merzimge sailaýǵa túsip, jumysty jalǵastyrýǵa niettimin. Sailaýǵa kim qatysqysy kelse, qatysa bersin. Eshkimge shekteý qoiylmaidy", – dedi Sadyr Japarov.
Qyrǵyzstandaǵy kezekti prezident sailaýy 2027 jylǵy 27 qańtarǵa josparlanǵan.
Sadyr Japarov alǵash ret 2021 jylǵy 10 qańtarda ótken kezekten tys prezident sailaýynda jeńiske jetken. Resmi málimet boiynsha, ol sailaýshylardyń 79,2 paiyz daýysyn jinaǵan.
Japarovtyń prezident qyzmetine kirisý rásimi 2021 jylǵy 28 qańtarda ótken.
