Rýmyniia parlamentiniń tómengi palatasy Moldovamen birigýge qatysty zań jobasyn maquldady. Qujat endi Senattyń qaraýyna jiberiledi. Eger zań qabyldansa, úkimet Kishinevpen birigý máselesi boiynsha resmi kelissózderdi bastaýǵa múmkindik alady, dep habarlaidy dalanews.kz.
Zań jobasyn "SOS Romania" partiiasy usynǵan. Rýmyniia zańnamasyna sáikes, eger bastama parlamenttiń jalpy otyrysynda 45 kún ishinde qaralmasa nemese keri qaitarylmasa, ol avtomatty túrde qabyldanǵan bolyp esepteledi. Bul rásim "únsiz qabyldaý" dep atalady.
Qujatta Rýmyniia parlamentiniń Moldovamen birigý týraly sheshim qabyldaityny jáne el úkimetine Kishinev biligimen birigý jónindegi kelissózderdi shuǵyl bastaýǵa ókilettik beriletini kórsetilgen. Zań jobasy endi Senattyń qaraýyna jiberiledi.
Buǵan deiin, 2026 jyldyń qańtarynda Moldova prezidenti Maiia Sandý eldiń Rýmyniiamen birigý ideiasyn ashyq qoldaitynyn málimdegen bolatyn. Ol britandyq The Rest is Politics podkastyna bergen suhbatynda, eger bul másele boiynsha referendým ótkizilse, birigýdi qoldap daýys beretinin aitqan.
Prezidenttiń sózinshe, qazirgi geosaiasi ahýalda Moldova sekildi shaǵyn memleket úshin demokratiia men egemendigin saqtaý qiyndap barady. Sonymen qatar, Sandý Máskeýdi birneshe ret Moldovanyń ishki saiasatyna aralasýǵa tyrysty dep aiyptaǵan.
Keiingi jyldary Moldovada Rýmyniiamen birigýdi qoldaityndardyń sany artyp keledi. Ásirese Resei men Ýkraina arasyndaǵy soǵys bastalǵannan keiin bul másele jii talqylana bastady. 2026 jylǵy naýryzda júrgizilgen saýalnamaǵa sáikes, Moldova azamattarynyń shamamen 42 paiyzy birigýdi qoldaidy, al 47 paiyzy qarsy. Al Rýmyniiada turǵyndardyń 72 paiyzy mundai bastamany quptaidy.
Sarapshylardyń baǵalaýynsha, shamamen 2,4 million turǵyny bar Moldova halqynyń úshten birinen astamy Rýmyniia azamattyǵyna da ie. Qazirgi tańda Rýmyniia – Moldovanyń eń iri saýda seriktesi. Sonymen qatar Býharest kórshi eldiń Resei energetikasyna táýeldiligin azaitýǵa jáne Eýropanyń energetikalyq júiesine qosylýyna qoldaý kórsetip keledi.
