"Baiqońyr" ǵarysh ailaǵyndaǵy keibir tehnologiialyq qurylǵylar satylymǵa qoiyldy, dep habarlaidy Dalanews.kz.
RIA Novosti málimetinshe, ashyq saýdaǵa shyǵarylǵan múlik — Qazaqstan men Reseidiń birlesken kásiporny "Báiterek" usynyp otyrǵan ǵarysh ailaǵyndaǵy óndiristik jabdyqtar. Aýktsionǵa qatysýǵa ótinimder 2025 jylǵy 4 maýsymǵa deiin qabyldanady. Sol kúni saýda da bastalady. Bul lot memlekettik múlik aýktsionynyń resmi saitynda jariialanǵan.
Aýktsionǵa zańdy tulǵalar, onyń ishinde sheteldik kompaniialar da qatysa alady. Biraq satyp alýshy úshin birqatar talaptar qarastyrylǵan. Atap aitqanda, kelisim jasalǵan sátten bastap 30 kúntizbelik kún ishinde jabdyqty bólshektep, alyp ketý úshin arnaiy tehnikaǵa ie bolýǵa nemese ony jalǵa alýǵa mindetti.
"Báiterek" kompaniiasynyń málimetinshe, bul satylym ǵaryshtyq-zymyran keshenin jańartý jumystarynyń bir bóligi. Jospar boiynsha, osy jyldyń sońyna qarai keshenniń alǵashqy synaq ushyrýy júzege asyrylady.
"Bul jabdyqtardy ótkizý – bar infraqurylymdy tiimdi paidalanýǵa jáne jańa tehnologiialyq júielerdi ornalastyrýǵa daiyndyq sheńberinde júrgizilip otyr. Jańa jabdyqtar jetkizile bastady", – dep málimdedi kompaniia.
Aita keteiik, Qazaqstan men Resei 2004 jyldan beri «Báiterek» ǵaryshtyq-zymyran keshenin qurý jobasyn talqylap keledi. Sol jyly taraptar Baiqońyr bazasynda jańa birlesken kásiporyn qurý týraly kelisimge qol qoiǵan bolatyn.
