Resei Ýkraina energetikasynyń nysandaryna jappai soqqy jasaýǵa daiyndyqty bastady, dep habarlaidy dalanews.kz.
«Resei Federatsiiasynyń Qarýly kúshteri Ýkraina energetika nysandaryna jappai soqqy jasaýǵa daiyndyqty bastady», – dep málimdedi Resei Qorǵanys ministrligi.
Resei vedomstvosynyń málimetinshe, mundai sheshim Ýkrainanyń Reseidegi azamattyq infraqurylymǵa, sondai-aq otyn-energetika kesheni nysandaryna jasap otyrǵan shabýyldaryna jaýap retinde qabyldanǵan.
Sonymen qatar Resei Qorǵanys ministrligi Ýkrainanyń qorǵanys ónerkásibi nysandaryna úilestirilgen soqqylar jalǵasyp jatqanyn habarlady.
Máskeýdiń málimdemesi Ýkraina aýmaǵyndaǵy áýe shabýyldarynyń kúrt kúsheigen kezeńine tuspa-tus keldi. Ýkrainalyq biliktiń málimetinshe, sońǵy kúnderi Reseidiń soqqylary Kiev pen eldiń ózge de óńirlerine áser etken. Ýkraina prezidenti Vladimir Zelenskii tórt kún ishinde Resei Ýkrainaǵa shamamen 1,5 myń dron ushyrǵanyn, olardyń jartysynan astamy reaktivti drondar bolǵanyn málimdedi.
31 tamyzǵa qaraǵan túni Reseidiń jańa shabýyldary Ýkrainanyń Donetsk, Dnepropetrovsk, Zaporoje, Harkov, Sýmy jáne Nikolaev oblystaryndaǵy energetikalyq infraqurylymǵa zaqym keltirdi. «Ýkrenergo» kompaniiasy apatty qalpyna keltirý jumystary júrgizilip jatqanyn habarlady.
Sonymen qatar Kiev sońǵy aptalarda Reseidiń energetikalyq infraqurylymyna jasaityn shabýyldaryn kúsheitti. Ýkrainalyq drondar Reseidiń birqatar munai óńdeý kásiporyndaryna soqqy jasady. Atap aitqanda, tamyzdyń sońynda Nijegorod, Rostov, Krasnodar jáne Perm oblystaryndaǵy munai óńdeý zaýyttarynyń zaqymdanǵany týraly habarlandy.
Jaǵdai jylytý maýsymy qarsańynda erekshe alańdaýshylyq týǵyzyp otyr. Ýkraina buǵan deiin energetikalyq nysandardyń qorǵanysyn kúsheitip, zaqymdanǵan infraqurylymdy qalpyna keltirýge qajetti jabdyq qoryn ulǵaitý qajettigin málimdegen.
Osy jaǵdaida Reseidiń málimdemesi Ýkraina energetikalyq júiesine jasalýy múmkin jańa soqqylar tolqynyna daiyndyq júrip jatqanyn kórsetýi múmkin.
