Ресей Украина энергетикасының нысандарына жаппай соққы жасауға дайындықты бастады, деп хабарлайды dalanews.kz.
«Ресей Федерациясының Қарулы күштері Украина энергетика нысандарына жаппай соққы жасауға дайындықты бастады», – деп мәлімдеді Ресей Қорғаныс министрлігі.
Ресей ведомствосының мәліметінше, мұндай шешім Украинаның Ресейдегі азаматтық инфрақұрылымға, сондай-ақ отын-энергетика кешені нысандарына жасап отырған шабуылдарына жауап ретінде қабылданған.
Сонымен қатар Ресей Қорғаныс министрлігі Украинаның қорғаныс өнеркәсібі нысандарына үйлестірілген соққылар жалғасып жатқанын хабарлады.
Мәскеудің мәлімдемесі Украина аумағындағы әуе шабуылдарының күрт күшейген кезеңіне тұспа-тұс келді. Украиналық биліктің мәліметінше, соңғы күндері Ресейдің соққылары Киев пен елдің өзге де өңірлеріне әсер еткен. Украина президенті Владимир Зеленский төрт күн ішінде Ресей Украинаға шамамен 1,5 мың дрон ұшырғанын, олардың жартысынан астамы реактивті дрондар болғанын мәлімдеді.
31 тамызға қараған түні Ресейдің жаңа шабуылдары Украинаның Донецк, Днепропетровск, Запорожье, Харьков, Сумы және Николаев облыстарындағы энергетикалық инфрақұрылымға зақым келтірді. «Укрэнерго» компаниясы апатты қалпына келтіру жұмыстары жүргізіліп жатқанын хабарлады.
Сонымен қатар Киев соңғы апталарда Ресейдің энергетикалық инфрақұрылымына жасайтын шабуылдарын күшейтті. Украиналық дрондар Ресейдің бірқатар мұнай өңдеу кәсіпорындарына соққы жасады. Атап айтқанда, тамыздың соңында Нижегород, Ростов, Краснодар және Пермь облыстарындағы мұнай өңдеу зауыттарының зақымданғаны туралы хабарланды.
Жағдай жылыту маусымы қарсаңында ерекше алаңдаушылық туғызып отыр. Украина бұған дейін энергетикалық нысандардың қорғанысын күшейтіп, зақымданған инфрақұрылымды қалпына келтіруге қажетті жабдық қорын ұлғайту қажеттігін мәлімдеген.
Осы жағдайда Ресейдің мәлімдемесі Украина энергетикалық жүйесіне жасалуы мүмкін жаңа соққылар толқынына дайындық жүріп жатқанын көрсетуі мүмкін.
