Qyrǵyzstanda bilikti basyp alýǵa áreket jasady dep aiyptalǵan Qamshybek Táshievtiń isi boiynsha sot bastaldy, dep habarlaidy dalanews.kz.
Bishkektegi Pervomai aýdandyq sotynda Qyrǵyzstan MUQK-niń burynǵy basshysy Qamshybek Táshievke qatysty aldyn ala sot tyńdaýy ótti. Ol bilikti kúshpen basyp alýǵa daiyndaldy jáne qyzmettik ókilettigin asyra paidalandy degen kúdikke ilingen.
Jergilikti BAQ málimetinshe, sot protsesi qupiia rejimde ótip jatyr. Osyǵan bailanysty sot pristavtary men qyzmetkerleri zal ornalasqan dálizge de eshkimdi kirgizbegen.
Buǵan deiin advokat Ikramidin Aitqulov Qamshybek Táshievke Qyrǵyzstan Qylmystyq kodeksiniń "Bilikti kúshpen basyp alý nemese ustap turý, sondai-aq, konstitýtsiialyq qurylysty kúshpen ózgertýge baǵyttalǵan áreketter" jáne "Qyzmettik ókilettikti asyra paidalaný" baptary boiynsha aiyp taǵylǵanyn málimdegen edi.
Bul iske basqa da eks-sheneýnikterdiń qatysy bar. Alaida olardyń naqty mártebesi ázirge belgisiz.
