Respublica partiiasy 2023 jylǵy Májilis sailaýymen salystyrǵanda biylǵy Quryltai sailaýynda az daýys jinady, dep habarlaidy dalanews.kz.
Partiia múshesi, burynǵy depýtat Oljas Quspekov bul aiyrmashylyqty partiia quramyndaǵy jáne saiasi ortadaǵy ózgeristermen bailanystyrdy.
2023 jylǵy sailaýda Respublica 547 myńnan astam daýys jinap, Májiliske ótken bolatyn. Al 2026 jylǵy Quryltai sailaýynda partiianyń aldyn ala nátijesi 510 myńǵa jýyq daýys boldy.
Quspekovtiń aitýynsha, sailaýshylardyń tańdaýy men partiia músheleriniń saiasi ustanymdary ýaqyt óte ózgerýi zańdy qubylys.
«Adamnyń jyldar óte kele óz oiyn ózgerte bilýi qalypty dep oilaimyn. Óitkeni ár adam ýaqyt óte kele ózine qatysty suraqtarǵa jaýap tabady, óziniń kózqarasyn ózgertedi. Basqa partiialardyń quramyna ótken adamdar da ózderiniń suraqtaryna jaýap tapqan shyǵar, óz tańdaýlaryn jasaǵan shyǵar. Men úshin adamnyń óz oiyn ózgerte bilýi jaman nárse emes. Kerisinshe, adam ózgerip jatqan jaǵdaiǵa qarai óz kózqarasyn qaita qaraýdy bilýi kerek. Biz de óz qatarymyzda ózgerister bolǵanyn kórip otyrmyz. Bul qalypty protsess. Jalpy, jyldar óte kele adamnyń ózine qatysty nárselerge kózqarasy, tańdaýy ózgerýi múmkin. Eń bastysy, bul jerde adamǵa degen qastyq pen zalymdyq bolmaýy kerek. Saiasi kózqarastar ártúrli bolýy múmkin, adamdardyń tańdaýy ózgerýi múmkin, biraq bir-birine degen adamdyq qarym-qatynas saqtalýy tiis», – dedi Oljas Quspekov.
Osylaisha, Respublica biylǵy sailaýda shamamen 510 myń daýys jinap, Quryltaida 9 depýtattyq mandat aldy. Partiianyń nátijesi 2023 jylǵy kórsetkishten tómen bolǵanymen, ol sailaýda belgilengen ótý sheginen joǵary nátije kórsetti.
