Parashiýtshiniń bul áreketi jinalǵan jurt úshin kútpegen jaǵdai boldy. Ile aýdanynyń turǵyndary sportshynyń ushaqtan jerge quldilaǵan sátin qyzyǵa tamashalady. Ol daýys berý ornyna dál qondy. Bul erekshe aktsiiany júzege asyrǵan – zapastaǵy ofitser, parashiýttik daiyndyq bóliminiń komandiri, tandem-nusqaýshy Timofei Merkýlov, dep habarlaidy dalanews.kz.
Ol – Mysyrdaǵy piramidalardyń mańyna qonǵan alǵashqy qazaqstandyq sportshy. Sondai-aq Elbrýs taýyna sekirip, AQSh aspanynda ótken 100-way halyqaralyq áýe formatsiiasyna qatysqan. Onyń enshisinde ártúrli úlgidegi parashiýttermen jasaǵan 1 700-den astam sekirý bar.
«Jaqynda óńirde aviatsiia men parashiýt sportyn nasihattaityn tamasha aviatsiialyq festival ótti. Bul halyqtyń aviatsiia men parashiýt sportyna qyzyǵýshylyǵy joǵary ekenin kórsetti. Búgin ony ári qarai jalǵastyryp, sailaý ýchaskesine sekirýdi uiǵardyq. Osy arqyly aviatsiia men parashiýt sportyna, sondai-aq el úshin mańyzdy oqiǵa – Quryltai sailaýyna kópshilik nazaryn aýdarǵymyz keldi. Men úshin daýys berý – aspanda qabyldanatyn árbir sheshimmen teń jaýapty mindet ári azamattyq borysh», – dedi Timofei Merkýlov.
Bul jait turǵyndar úshin este qalarlyq sátke ainaldy. Muny kórgen kópshilik mańyzdy kúnniń mánin túsinip, sailaý ýchaskelerine aǵyldy. Árine, olar ekstremaldy triýkter jasaǵan joq, degenmen bári sailaýda óz tańdaýyn jasady. Osylaisha, Ile aýdanyndaǵy dástúrli daýys berý erekshe oqiǵamen tolyqty.
