TúrkPA halyqaralyq baqylaýshylar missiiasy Qazaqstandaǵy Quryltai depýtattarynyń sailaýy birqalypty ári uiymdasqan jaǵdaida ótkenin málimdedi. Baqylaýshylar sailaý barysynyń ashyqtyǵyn, barlyq sanattaǵy azamattardyń daýys berýge jasalǵan jaǵdaidy jáne jastardyń belsendiligin erekshe atap ótti, dep habarlaidy dalanews.kz.
Sailaýdy baqylaý qorytyndysyn Túrki memleketteri Parlamenttik Assambleiasy (TMPA) missiiasynyń basshysy Osman Mesten tanystyrdy.
Onyń aitýynsha, missiia músheleri Qazaqstannyń sailaý zańnamasy men oǵan engizilgen ózgeristerdi, sailaýshylar men kandidattardy tirkeý tártibin, sailaýaldy naýqannyń ótý barysyn, sondai-aq sailaýdy baqylaýdy uiymdastyrý tártibin zerdelegen.
Osman Mesten biylǵy sailaý naýqanynyń eldiń saiasi damý jolyndaǵy airyqsha mańyzyna da toqtaldy. 23 tamyzda ótken sailaý Qazaqstan bir palataly Quryltai júiesine kóshkennen keiingi alǵashqy parlamenttik sailaý boldy.
«Missiia sailaý organdarynyń naýqanǵa daiyndyǵyn jáne ony ótkizý jumystaryn, sonyń ishinde sailaýdy qamtamasyz etetin azamattardy oqytý men halyqty aqparattandyrý sharalaryn oń baǵalaidy. Biz barǵan sailaý ýchaskelerinde daýys berý uiymdasqan túrde ótti. Sailaýshylar óz tańdaýyn erkin jasap, daýys berý quqyǵyn esh kedergisiz júzege asyra aldy», – dedi Mesten.
Daýys berý kúni TúrkPA ókilderi Astana men Almatydaǵy sailaý ýchaskelerin aralyp, olardyń ashylýynan bastap daýysty sanaý protsesine deiin baqylaǵan.
Missiia múmkindigi shekteýli azamattardyń daýys berýine jasalǵan jaǵdaiǵa da erekshe nazar aýdardy. Baqylaýshylar sailaý ýchaskelerinde pandýstar, Brail qarpindegi arnaiy úlgiler, sondai-aq kórý jáne estý qabileti shekteýli azamattarǵa arnalǵan kómekshi quraldar qarastyrylǵanyn atap ótti. Ortalyq sailaý komissiiasynyń aqparattyq materialdary men otyrystary da ymdaý tiline aýdarylǵan.
TúrkPA-nyń Qorshaǵan orta, tabiǵi resýrstar jáne densaýlyq saqtaý komissiiasynyń múshesi Mahmut Ózer Qazaqstandaǵy sailaýdy basqa elderdegi sailaý protsesterimen salystyra otyryp, eki erekshelikke basa nazar aýdardy.
Birinshisi – barlyq azamattyń daýys berý quqyǵyn júzege asyrýyna múmkindiktiń berilýi. Máselen, densaýlyǵyna bailanysty sailaý ýchaskesine bara almaityn azamattar men shetelde júrgen qazaqstandyqtardyń da daýys berýine tolyq jaǵdai qarastyrylǵan. Ekinshisi – Qazaqstannyń halyqaralyq baqylaýshylar úshin ashyq bolýy.
«Daýys berý barynsha ashyq ótip, halyqaralyq baiqaýshylar úshin sailaý barysyn baqylaýǵa barlyq jaǵdai jasaldy», – dep túiindedi Ózer.
