QazTehna jáne Allur kásiporyndarynyń qyzmetkerleri Qazaqstan Respýblikasy Quryltaiy depýtattaryn sailaýǵa belsendi qatysty, dep habarlaidy dalanews.kz.
Saran qalasyndaǵy QazTehna kásipornynda 900-den astam adam eńbek etedi. Olardyń kópshiligi sailaý ýchaskelerine otbasylarymen birge kelgen.
«Men úshin ár sailaýǵa qatysý – eldiń bolashaǵyna áser etetin sheshimderdi qabyldaýǵa óz úlesimdi qosý múmkindigi. Biz otbasymyzben birge keldik. Osylaisha balalarymyz da memlekettiń qoǵamdyq ómirine belsendi aralasýdyń mańyzyn túsinedi», – dedi «QazTehna» JShS logistika jónindegi direktory Baqytjan Altaev.
Onyń áriptesi, ýchaske sheberi Sanat Áshimov jaýapkershiliktiń tek jumysta ǵana emes, azamattyq tańdaýda da mańyzdy ekenin atap ótti.
«Men óndiris salasynda jumys isteimin jáne kún saiyn atqarǵan isimniń nátijesine jaýap berýge daǵdylanǵanmyn. Munda eńbek etetin barlyǵymyz úshin bul – qalypty nárse. Menińshe, óz tańdaýymyzǵa da dál sondai jaýapkershilikpen qaraýymyz kerek», – dedi ol.
Sailaý kúni Qostanaidaǵy Allur zaýytynyń ujymy da joǵary belsendilik tanytty. Biri jumys aýysymy bastalmai turyp, endi biri jumystan keiin sailaý ýchaskesine bardy. Al keibiri úshin daýys berý otbasylyq dástúrge ainaldy.
№859 sailaý ýchaskesine Shopanovtar otbasy birge keldi. Olar – Allur kásipornyndaǵy eńbek dinastiiasynyń ókilderi.
Bekejan Tileýuly – sheber, jubaiy Laila Kamiialqyzy – muraǵat meńgerýshisi, al uly Ramazan sapany baqylaýdyń ishki úderisteriniń júielik baǵytyna jaýap beredi. Árqaisysy zaýytqa óz jolymen kelgenimen, búgin olardy tek ortaq jumys emes, otbasylyq qundylyqtar men el bolashaǵyna degen ortaq jaýapkershilik biriktirip otyr.
«Otbasymyzda da, elimizdiń ómirinde de mańyzdy oqiǵalardyń bárin birge ótkizgendi durys kóremiz. Jumysta árqaisymyzdyń óz mindetimiz bar. Al bul jerge el azamaty retinde keldik. Bolashaqtyń bizdiń erik-jigerimizge, sonyń ishinde otbasymyzdyń qabyldaǵan sheshimine de bailanysty ekenin jaqsy túsinemiz», – dedi Bekejan Shopanov.
Ramazan Shopanov jaýapkershilikke degen kózqaras eń aldymen otbasynda qalyptasatynyn aitty.
«Men eńbek pen óz isińe jaýapkershilikpen qaraýdy árdaiym joǵary baǵalaityn otbasynda óstim», – dedi ol.
Qostanai men Sarandaǵy mashina jasaý kásiporyndarynyń ujymdary úshin sailaýǵa qatysý – konstitýtsiialyq quqyqtaryn júzege asyryp, Qazaqstannyń bolashaǵyna óz úlesin qosý ári azamattyq ustanymyn bildirýdiń múmkindigi boldy.
El tarihyndaǵy iri oqiǵalar ár azamattyń jeke tańdaýynan quralady. Búgin myńdaǵan qazaqstandyq mashina jasaýshy óz tańdaýyn jasap, el bolashaǵyna qatysty azamattyq ustanymyn bildirdi.
