Aitýly sharaǵa Ál-Farabi atyndaǵy QazUÝ-dyń Basqarma Tóraǵasy – Rektory Janseiit Túimebaev, Oljas Súleimenov, Smaǵul Elýbai, Marat Toqashbaev, Qali Sársenbai, Sábit Shildebai syndy ziialy qaýym ókilderi, diplomattar men BAQ ókilderi qatysty.
Shara barysynda sóz sóilegen QazUÝ qurmetti meimanǵa ýniversitetke kelgeni úshin alǵys aityp, Qazaqstan men Túrkiianyń kópjyldyq jemisti yntymaqtastyǵynyń mańyzdylyǵyn atap ótti.
– Qazaqstan men Túrkiia – baýyrlas memleket. Eki eldiń qarym-qatynasy táýelsizdikke deiin bastalǵan. Qazaqstan egemendigin alǵanda alǵash quttyqtap, dostyq nietin jetkizgen Túrkiia memleketi bolatyn. 1992 jyly Qazaqstan men Túrkiia memleketteri resmi túrde diplomatiialyq qarym-qatynas ornatty. Sondyqtan biz úshin táýelsizdiktiń 30 jyldyǵyna orai jáne aldaǵy eki el yntymaqtastyǵynyń 30 jyldyǵy aiasynda Túrkiia Respýblikasynyń 11-shi Prezidenti Abdýlla Gúl myrzanyń ýniversitetimizge kelgeni airyqsha mártebe, – dedi ýniversitet rektory.
Qazaqstanǵa jumys saparymen kelgen Túrkiianyń eks-prezidenti Abdýlla Gúl Qazaqstan Táýelsizdiginiń 30 jyldyǵymen quttyqtap, ystyq lebizin bildirdi. Sondai-aq qurmetti meiman Qazaqstandy damytýdaǵy Elbasy Nursultan Nazarbaevtyń eleýli rólin airyqsha atap ótti.
– Qazaqstan – bizdiń atajurtymyz. Barshańyzdy Táýelsizdiktiń 30 jyldyǵymen quttyqtaimyn! Qazaqstannyń jetistikterin biz QR Tuńǵysh Prezidenti Nursultan Nazarbaevtyń esimimen tyǵyz bailanystyramyz. Búginde elderińiz álemdik qoǵamdastyqta laiyqty oryn alyp otyr. Bul Nursultan Ábishulynyń úlken eńbegi. Ol halyq pen eldiń igiligi úshin kóptegen sharalardy uiymdastyryp, Qazaqstandy jańa deńgeige kóterdi. Búginde Ult kóshbasshysynyń sara jolyn Memleket basshysy Qasym-Jomart Kemeluly Toqaev abyroimen jalǵastyryp keledi. Osyndai kezdesýdi uiymdastyryp, jyly qabyldaǵandaryńyz úshin ýniversitet rektory Janseiit Túimebaevqa jáne uiymdastyrýshylarǵa alǵysymdy bildiremin, – dedi Abdýlla Gúl.
Kezdesý barysynda Abdýlla Gúl jinalǵandarǵa dáris oqydy. Sonymen qatar Túrkiianyń qoǵam qairatkeri óziniń saiasi saladaǵy kópjyldyq tájiribesimen bólisip, qatysýshylardyń suraqtaryna jaýap berdi.
Shara sońynda Abdýlla Gúlge Ál-Farabi atyndaǵy Qazaq ulttyq ýniversitetiniń «Qurmetti professory» ataǵy berildi. Sondai-aq ýniversitet rektory Janseiit Túimebaev meimandy «Ál-Farabi» Altyn medalimen marapattady.
Eske sala keteiik, Abdýlla Gúl 2002-2003 jyldar aralyǵynda Túrkiianyń premer-ministri, keiin premer-ministrdiń kómekshisi, shetel isteri ministri qyzmetin abyroimen atqarǵan. Al 2007-2014 jyldar aralyǵynda Túrkiianyń Prezidenti boldy.
https://www.youtube.com/watch?v=ufsSZ4V1KQI
Ál-Farabi atyndaǵy QazUÝ-dyń Baspasóz qyzmeti
