Sońǵy bes jylda Qazaqstannyń IT-qyzmetter eksporty 2020 jylǵy 33,5 mln AQSh dollarynan 2025 jyldyń qorytyndysy boiynsha 1,142 mlrd AQSh dollaryna deiin ósti. Osylaisha, salystyrmaly túrde qysqa ýaqyt ishinde IT-qyzmetter qalyptasyp kele jatqan baǵyttan el eksportynyń mańyzdy salalarynyń birine ainaldy, dep habarlaidy dalanews.kz.
IT-qyzmetter eksporty osy kezeń boiy turaqty ósim kórsetti. 2021 jyly eksport kólemi 60,07 mln AQSh dollaryn, 2022 jyly 337 mln AQSh dollaryn, 2023 jyly 529,1 mln AQSh dollaryn, 2024 jyly 690,7 mln AQSh dollaryn qurady. Al 2025 jyly bul kórsetkish alǵash ret 1 mlrd AQSh dollarynan asty.
Sonymen qatar Qazaqstan IT-qyzmetterdiń netto-eksporttaýshysy deńgeiine shyqty. Eksporttan túsken tabys sheteldik tsifrlyq sheshimderdi importtaýǵa jumsalǵan 429 mln AQSh dollarynan 2,6 eseden astam joǵary boldy.
Osy kórsetkishterdiń aiasynda Qazaqstan óńirdegi tehnologiialyq eksporttaýshylar arasyndaǵy pozitsiiasyn nyǵaityp keledi. Salystyrý úshin, Grýziianyń telekommýnikatsiialyq, kompiýterlik jáne aqparattyq qyzmetter eksporty 2024 jyly 842,3 mln AQSh dollaryn, al Armeniiada shamamen 1,18 mlrd AQSh dollaryn qurady.
Eksport kóleminiń ósýi qazaqstandyq IT-kompaniialardyń halyqaralyq naryqtardaǵy qatysý geografiiasynyń keńeiýimen qatar júrip jatyr. Búginde otandyq tsifrlyq sheshimder álemniń 110-nan astam eline eksporttalady. Astana Hub qatysýshylarynyń eksporty 2025 jyly 634 mln AQSh dollaryna jetti, 537 kompaniia sheteldik naryqtarǵa ónimderin shyǵaryp otyr, al ekojúiede 32 myńnan astam jumys orny quryldy.
Kelesi kezeń qazaqstandyq tehnologiialyq kompaniialardy aýqymdy túrde damytý jáne olardyń iri halyqaralyq naryqtarǵa shyǵýyna baǵyttalady. Basym baǵyt retinde AQSh, Eýropa, Taiaý Shyǵys jáne Aziia naryqtary, sondai-aq otandyq IT-sheshimderdi halyqaralyq deńgeide ilgeriletý arnalary qarastyrylyp otyr. Strategiialyq maqsat Qazaqstannyń IT-qyzmetter eksportyn 2030 jylǵa qarai 5 mlrd AQSh dollaryna deiin jetkizý.
Qazaqstandaǵy ósimniń basty ereksheligi tek aýqymynda ǵana emes, onyń qarqynynda da. Osydan bes jyl buryn elimizdiń IT-qyzmetter eksporty ondaǵan million AQSh dollarymen ólshense, búginde 1 mlrd AQSh dollarynan asty. Qazaqstan is júzinde qalyptasyp kele jatqan IT-naryqtar sanatynan óńirlik tehnologiialyq eksporttaýshylar qataryna ótti.
