Qazaqstannyń eki kompaniiasy aýyl sharýashylyǵy jerlerin ielenetin álemdegi eń iri kompaniialardyń qataryna kirdi. Geostatistica deregine sáikes, "Olja Agro" jáne "Qazaqstannyń astyq konsortsiýmy" jahandyq reitingtiń alǵashqy ondyǵyna jaiǵasqan, dep habarlaidy dalanews.kz.
Reitingte "Olja Agro" kompaniiasy 960 myń gektar aýyl sharýashylyǵy jerimen besinshi orynǵa ie boldy. Al 910 myń gektar jeri bar "Qazaqstannyń astyq konsortsiýmy" segizinshi orynǵa shyqty.
"Olja Agro" – Qazaqstandaǵy iri aýyl sharýashylyǵy kompaniialarynyń biri. Ol astyq jáne basqa da aýyl sharýashylyǵy ónimderin óndirýmen ainalysady. "Qazaqstannyń astyq konsortsiýmy" da elimizdiń agrarlyq salasyndaǵy iri kompaniialardyń qataryna jatady.
Reitingte birinshi oryndy reseilik "Miratorg" ielengen. Kompaniianyń qaramaǵynda 1,38 mln gektar aýyl sharýashylyǵy jeri bar. Odan keiin 1,30 mln gektar jeri bar braziliialyq Raízen jáne 1,23 mln gektar jeri bar reseilik "Agrokompleks" ornalasqan. Tórtinshi orynda AQSh-tyń Stan Kroenke kompaniiasy tur. Onyń ieligindegi jer kólemi – 1,09 mln gektar.
Qazaqstandyq "Olja Agrodan" keiin altynshy orynǵa 940 myń gektar jeri bar reseilik "Prodimeks" jaiǵasqan. Jetinshi orynda 920 myń gektarmen Argentinanyń Compañía de Tierras del Sud Argentino kompaniiasy tur. Al segizinshi oryndaǵy "Qazaqstannyń astyq konsortsiýmynan" keiin reseilik "Rýsagro" - 820 myń gektar jáne braziliialyq SLC Agrícola – 684 myń gektar jermen alǵashqy ondyqty túiindeidi.
Geostatistica málimetinshe, 2025 jyly osy on kompaniianyń ieligindegi aýyl sharýashylyǵy jerleriniń jalpy kólemi 10,24 mln gektar bolǵan. Onyń 1,87 mln gektary Qazaqstannyń eki kompaniiasyna tiesili.
