Qazaqstannyń BUU-daǵy bitimgerlik bólimshesiniń áskerı qyzmetshilerine aı saıyn 1 448 dollar tólenedi, oǵan qosa 40 dollar qalta shyǵyndary úshin beriledi, al jyl sońynda 345 dollar mólsherinde demalys aqysy qarastyrylǵan, dep habarlaıdy Dalanews.kz.

Bul týraly Qorǵanys mınıstriniń tárbıelik jáne ıdeologıalyq jumys jónindegi orynbasary Shaıh-Hasan Jazyqbaev málimdedi.

“Áskerı qyzmetshilerge aı saıyn 1 448 dollar tólenedi. Budan bólek, qalta shyǵyndary úshin 40 dollar qarastyrylǵan. Al jyl sońynda 345 dollar kóleminde demalys aqysy tólenedi”, – dedi Jazyqbaev sársenbi kúni Májilistiń jalpy otyrysynda.

Onda Qazaqstan úkimeti men Birikken Ulttar Uıymy arasyndaǵy ózara túsinistik týraly memorandýmdy jáne oǵan qosymsha hat almasý nysanyndaǵy kelisimdi ratıfıkasıalaý máseleleri talqylandy.

Onyń aıtýynsha, Qazaqstannyń BUU-daǵy bitimgerlik kúshteri bul qarjyny aı saıyn alyp otyrady. Áskerı qyzmetshilerge sanatorıı-kýrorttyq em qabyldaý quqyǵy tegin beriledi.

“Olar mısıa quramynda bolǵan ýaqyt áskerı qyzmet ótili esebinde eki ese kóp sanalady”, – dep qosty Jazyqbaev.