Qazaqstannan Reseige jetkizilmek bolǵag 480 totyqus Orynbor oblysyndaǵy "Saǵarshyn" halyqaralyq ótkizý beketinen keri qaitaryldy, dep habarlaidy dalanews.kz.
Derekkóz málimetinshe, qustardy tasymaldaýǵa qajetti qujattar talapqa sai bolmaǵan.
Reseidiń veterinariialyq jáne fitosanitariialyq qadaǵalaý qyzmetiniń málimetinshe, usynylǵan veterinariialyq sertifikatta qustar ákelingen aýmaqtaǵy epizootiialyq jaǵdai týraly aqparat kórsetilmegen. Sondai-aq qujattyń túpnusqalyǵyn jáne ondaǵy málimetterdi tekserýge múmkindik beretin Qazaqstannyń "EASÝ" aqparattyq júiesiniń QR-kody bolmaǵan.
Buǵan qosa, veterinariialyq sertifikatta jazylǵan tasymaldaý baǵyty halyqaralyq CMR júkqujatyndaǵy baǵytpen sáikes kelmegen.
"Totyqustardy el aýmaǵyna kirgizýge tyiym salyndy. Qustardyń barlyǵy Qazaqstandaǵy jóneltýshige qaitaryldy. Al júk tasymaldaýshy ákimshilik jaýapkershilikke tartyldy", - dep habarlady vedomstvonyń óńirlik basqarmasy.
Osy kúni Aqbulaq aýdandyq sotyna qustardy zańsyz tasymaldaýǵa qatysty taǵy bir is jiberilgeni belgili boldy. Tergeý málimetinshe, 38 jastaǵy shetel azamaty naýryz aiynda shekarada júzge jýyq quspen ustalǵan. Olardyń jalpy quny 22 million rýblden asady.
Tárkilengen qustardyń arasynda SITES konventsiiasynyń qorǵaýyna alynǵan jako totyqusy, tibet qyrǵaýyly jáne shubar rozella sekildi sirek túrler bolǵan. Qazir qustar haiýanattar baqtaryna ornalastyrylǵan. Kúdiktige eki qylmystyq bap boiynsha aiyp taǵylyp, is sot qaraýyna berildi.
